Shillong, Naitung, 17: Watla u Bah Khrawbok Mawniuh bad ka Kong Tennecy Lyngdoh Nongpiur ki la duh noh ïa ka ingshong iingsah kaba la shah bamduh ha ki thylliej ding barhem ha ka 13 tarik, Naitung, 2025 hynrei kim shym la duh mynsiem namarba dang don ki parabriew kiba don ka mon babha ban ïarap da ka pisa bad da ki tiar ki tar khnang kin dup lah ban pyndonkam ha ka jingim jong ki kaba manla ka sngi.
Ha ka sngi Palei, ki nongïalam jong ka Dorbar Shnong Madan Laban bad Riat Laban ki la leit ban ai jingïarap ïa kane ka long ïing da ki marbam mardih, ki tiar ki tar, ki jaiñ ki nep bad ka song pisa kaba ki la lum synniang kum ka dak jingsngewlem para briew.
Na ka liang jong ka shnong ba la mihkhmat ruh da ki nongïalam bad ki dkhot ka Seng Treilang ki Kynthei Madan Laban bad Riat Laban bad ka Seng Samla hapoh ka jingïalam jong u Secretary u Bah R.G Marbañiang ki la aiti sha ka longing u Bah Khrawbok ïa ka pisa 60 hajar kaba la noh synniang da ki nongshong shnong bad ha kajuh ka por na ka liang jong ki nongpynïaid ka Balang Unitarian ruh ki la jingïarap sha kane ka longiing ha kane kajuh ka sngi.
