Shillong, Naitung, 17: Ka Dorbar Shnong Lachaumiere ha ka 17 tarik, Naitung, 2025 ka la rakhe kynmaw burom ïa ka lyngkhuh sngi ïap kaba 190 snem jong u Syiem Tirot Sing, u Syiem jong ka Hima Nongkhlaw uba la ïakhun da ka thma ban pynher krad ïa ki Phareng.
Ha kane ka sngi ka Dorbar Shnong ka la pynkup burom ruh ïa ki riewpawkhmat ka jylla kiba long ki nongshong shnong jong ka shnong Lachaumiere ki la don bynta ha kaba noh synniang sha u sup u thiar jong ka imlang ka sahlang, kiba kynthup ïa ka Kong Theilin Phanbuh kaba la ïoh pdiang ïa ka khusnam Padma Shri bad kaba long teng ka Chairperson barim jong ka Meghalaya State Commission for Women, ka Zeenat Ara Ali ka nongseng ïa ka Dwar Jingkyrmen ban ai jinghikai kyrpang ïa ki khynnah kiba don jingthud ha ki dkhotmet, ka Kong Victoria Wahlang ka nongseng ïa ka Old Age Home, Kripa Victoria Senior Ciziten Home, u Bah Banmalang War Lyndem uba la pas ïa ka eksamin Meghalaya Civil Service ha une u snem 2025, u Bah Wanphrang Jyrwa uba la ïoh khur bun tylli ki takma ha ka rynsan ïalehkai sports, u Satbir Singh uba la rung sha ka jingïakhun phainal ha NE Superstar ha u snem 2011 bad u nonghikai shad bad kilan met, u Dr. Aman War, uba la shongthait kum u Director ka Health Service ka Sorkar Jylla bad uba la trei shitom ha ka jingïakhun pyrshah ïa ka jingpang khlam COVID-19 bad nalor kine la pynkup burom ruh ïa ki 9 ngut ki samla pule kiba la pas bha shakhmat ha ka eksamin SSLC, HSSLC bad ha ka Degree level.
Ha ka jingpynkup burom la sakhi lang da ka Myntri ka tnat ka Koit ka Khiah ka Dr. Ampareen Lyngdoh kaba la long kum ka Kongsan bad kynthup ruh ki paidbah nongshong shnong.
