Shillong, Nailur, 18: Ki nongleit nongwan ha ïew Polo, Shillong ki la her syrngiew ha ka sngi Thohdieng ha ka por kumba 2:00 baje noh sngi hadien ba la lap ïa kawei ka pla ïong ba la iehnoh ha kyndong ha ka jaka ba ju ieng ki kali Auto Rickshaw ïa kaba la suba ba la thep ïa ki tiar pynbthei.
U kyrwoh ba la phah da u Superintendent of Police ka East Khasi Hills u Bah Vivek Syiem u la ïathuh ba tang shu ïoh jingtip halor kane, ki Pulit ka kynhun Bomb Squad ki la leit mar mar ban pynlong ïa ka jingtohkit namar ka jingsuba ïoh don kino kino ki tiar pynbthei kiba lah ban buh jingma ïa ka jingim jong ki paidbah.
Tang hapoh khyndiat por ba la lap ïa kane ka pla, uwei u briew uba la pynithuh kyrteng ïalade kum u Nijimu Fithu, 24 snem ka rta, uba sah ha Kenuozou Colony, Kohima Sadar, Nagaland u la wan kam trai ïa kane ka pla.
Watla une u samla u la wan kam trai hynrei ki Pulit ka Bomb Disposal Team ki la pyndep beit la ka jong ka kamram katkum ki kyndon khnang ban pynthikna ïa ki tiar kiba la thep hapoh kane ka pla.
Ha ka jingkhynra, ka kynhun ka la lap ïa ki song ba la thep ïa u Ganja bad mar mar la pyntip noh sha ka kynhun Anti-Narcotics Task Force (ANTF) na ka bynta ban pyndep ïa ka kam katkum ki kyndon jong ka aiñ.
Ka jingtohkit halor kane ka kam ka dang ïaid shakhmat, la pyntip u SP.
