Shillong, Naitung, 18: Ka Meghalaya Pradesh Mahila Congress (MPMC) ha ka sngi Thohdieng ka la pynpaw ïa ka jingsngewkhia kaba khraw halor ka jingpyntriem jong ki ksew surok ïa ki nongleit nongwan ha ki bynta bapher bapher jong ka sor Shillong.
Ki don shibun ki nongshong shnong khamtam ki longkmie, ki khynnah skul bad ki rangbah kiba la shahdait ne shah thombor ha ki ksew surok. Kane ka la pynlong ïa ka leit ka wan ka jong ki kaba ym shngaiñ shuh, ong ka President ka MPMP ka Kong Joplyn Scott Shylla ha u kyrwoh ba la phah sha ki lad pathai khubor.
“Ka long kaei kaei kaba sngewsih ban tip ba ha ka por kaba kane ka jingeh ka la nang kiew stet, ka Shillong Municipal Board ka shu sngap jar bad kam shim jingkitkhlieh satia. Ka Mahila Congress ka dawa ba ka Shillong Municipal Board (SMB) bad ki tnat treikam kiba dei peit ïa kane ka bynta kin shimkhia mardor bad ban kem noh ïa kine ki ksew surok bad ban pynkit noh ïa ki sha ki jaka ba kyrpang lane ban buh ha ki jaka ri shipor kiba biang,” ong ka Kong Shylla.
“Ka la don ruh ka hukum na ka High Court ban shna noh ïa ki jaka ri ïa ki ksew surok bad ban pyntrei kam ïa ki lad ai dawai ban pynduh ka jingkha khun ïa ki. Hynrei, katkum ka jingsngew u paidbah, ka jingpyntreikam ka dang jngai bad slem palat, katba ki paidbah ki dang mad ïa ka jingma manla ka sngi,” ka la ong.
“Ka Meghalaya Pradesh Mahila Congress ka kyntu jur ïa ka Sorkar bad ka SMB ba kin shimkhia kloi kloi bad ym dei ban ap ba kan don shuh shuh ka jingjia ba sngewsih. Ka jingim bad ka jingshngaiñ jong ki paidbah kiba ïaid ba ieng ha surok ka dei ban long kaba kongsan tam,” ka la bynrap.
