Shillong, Naitung 18: U Symbud Myntri Rangbah ka jylla bad uba khmih ïa ka tnat ki Kam Pohïing u Bah Prestone Tynsong ha ka sngi Thohdieng u la ïaiban ba ka Sorkar Jylla kan ïai kyrpad ïa ka Sorkar Assam ban pynphai biang ïa ka Block I bad Block-II sha ka jylla Meghalaya.
U Bah Tynsong, uba long ruh u Chairman jong ka Regional Committee, u la ong ba u dang ap jubab na u Chairman jong ka Regional Committee na ka jylla Assam ban buh sngi na ka bynta ban pynlong ïa ka jingleit jurip lang ïa u pud u sam.
Ha ka jingïakren bad ki lad pathai khubor, u Bah Tynsong u la pynpaw ba un pynlong ïa ka jingleit jurip lang ha kano kano ka por khamtam hadien ba la kut ka aïom slap.
“Nga dang ap ban ïoh ktien ka jylla Assam namar ha Ri Bhoi ngi don kumba ar ne lai ngut ki Chairmen na ka liang ka Assam katba na ka liang ka Meghalaya nga dei tang ma nga marwei u Chairmen. Kumta nga dang ap ïa ka tarik ka ban buh da ka Assam. Ha kajuh ka por ka elekshon ha jylla Assam kan sa long ha u snem ban wan, ngam tip shuh la kin lah ne em ban ai ka por na ka bynta kane ka jingïaleit jurip lang bad haduh mynta nga dang ap ïa ka jubab na ki,” u la ong.
“Na ka liang jong ngi, ngi la long kiba la pynkhreh. Ha ka jingshisha, ngi kwah ba kane ka jingjurip ka dei ban long ha kano kano ka por bad kano kano ka khyllipmat. Ha ka jingshisha ha kine ki por ba dang slap kan sa long ka jingeh hynrei ka lah pat ban long ha shwa ban kut u bnai Nailur bad shisien ba ka aïom slap ka la kut, nga tharai ngi kwah ruh ba na ka liang ka Assam ruh kin long kiba la khreh na ka bynta kane ka jingjurip ha baroh artylli ki committee,” u la bynrap.
Haba kylli, u Symbud Myntri Rangbah u la phai sha ka jingpynbna u snem 1950, kaba kdew ïa ka jingpynphai ïa ki katto katne ki jaka na Meghalaya sha Karbi Anglong. U la ong ruh ba ka kam ka mynta ka phai sha ka jingkwah ban pynphai biang ïa ka Block I bad II sha Meghalaya.
“Na ka liang ka sorkar kaei kaba ngi kwah ka long ban kyrpad ïa ka sorkar Assam ban pynphai biang ïa kine ki jaka sha Meghalaya. Nga ngeit ba kane ka dei ka kam kaba kongsan bha kaba ngi la ïakren mynta.”
U Bah Tynsong ha kawei ka liang u la banjur ïa ka jingdonkam baroh arliang ban pynneh ïa ka status quo bad ban wanrah ka jinglong jingman kaba suk ba saiñ khnang ban lah pynbeit noh ïa u pud u sam.
U Bah Tynsong u la kyrpad ïa ki shnong na baroh arliang ba kin pynneh ïa ka shongsuk shongsaiñ bad ka jingsngew shipara, da kaba pynpaw ba kane ka jingïakajia pud ka dei kaba la ïaid mynta da ki pateng pateng.
Katkum ka jingong jong u, ïa kane ka kam yn lah ban pynbeit lyngba ka jingjurip lang bad ka jingïakren hapdeng ki committee, ba la ïalam da baroh arngut ki Myntri Rangbah.
“Kane ka jingeh kan ïaibteng katba ym pat lah ban shong ka jingïalang ki committee bad ban ïakren ïa kine baroh ki kam hynrei na ka liang jong nga, nga kyrpad ïa baroh arliang ba kin pynneh ïa ka status quo. Nga kyrpad ba kan dei ban don ka shongsuk shongsaiñ khnang ba kine ki jingïapher kiba jia mynta yn lah ban pynsangeh noh syndon,” u la ong.
