Shillong, Naitung, 19: Lai phew ngut ngut ki kynthei kiba angnud ban long ki nongsengkam sengjam ha rilum Jaiñtia ki la ïoh jinghikai ha ka kam shna khiew ranei ha Larnai, ka rukom shna khiew ba la rim bha, ha ka jingpyrshang ban pynneh pynsah ïa ka jingnang jingstad tynrai bad ban kyntiew ïa ka jingim jong ki briew sha ki thaiñ nongkyndong.
Ha ka prokram ba la ai kyrteng, “Application of Indigenous Knowledge in Pottery Making’, kba hynriew sngi kaba la sdang naduh ka 12 tarik bad pynkut noh ha ka 18 tarik mynta u bnai ba la pynlong ha Community Hall jong ka Deen Dayal Upadhyay Community and Skill Development Centre (DDUCC), Wahïajer, kaba dei kawei na ki shnat ai jinghikai kaba hap hapoh ka skulbah North-Eastern Hill University (NEHU).
Ka nongshna khiew ranei ba tbit bad ba la pawnam bha ka Kong Roilin Pyrtuh na ka shnong Larnai ka la pyni nuksa kumno ban shna ïa ki khiew ranei da ki kti. Ka Ka jingshna khiew ranei ha ka shnong Larnai dei kaba la pawnam ym tang ha ka jylla Meghalaya hynrei wat shabar ka jylla. Ka jingpawnam ka long namarba la shna ïa ki khiew ranei tang da ki kti, khlem da pyndonkam ïa ki kor ki bor ne ki mashin hynrei la pyndonkam beit da ki buit ba la ai naduh ki menbarim naduh ka rukom khleh ïa ka dewbyrtha haduh ka jingpynwandur, ka jingsyang ha ka ding bad ka jingoh shrong pynitynnat.
Ki nongïashim bynta ki kynthup ïa ki kynthei, ki samla, bad ki nongrep kiba angnud ban seng ïa ki kam barit kiba don jingïadei bad ka pateng tynrai ha ki kam shna jingshna ha ka thaiñ.
Ha ka jingai jinghikai, ym tang ba la pyni ïa ki sap ha ka kam shna, hynrei la thmu ruh ban pynneh pynsah ïa ka lariti bad hynrei ban pynroi da kaba pynneh pynsah bad ban kyntiew ïa ka jingkwah ban sengkam sengjam kaba ïadei shi bynta bad ka NEP 2020, kaba pynïasoh lang ïa ki lad ai jinghikai bad kumjuh ruh ha ka jingpule.
Ha ka jingpynkut ïa kane ka jingai jinghikai ha ka sngi Thohdieng u Pro Vice-Chancellor ka NEHU u Prof. S. Umdor uba la long kum kongsan u la ïaroh ïa ka jingtrei shitom jong ka DDUCC kaba la pynim ïa ki jingtrei tynrai. U Lukas Jat, u nongshong shnong na ka shnong Wahïajer u la long kum u symbud kongsan ryngkat ka jingdon lang jong u Principal in-charge ka DDUCC, u Dr. F.R. Sumer, u Branch Manager jong ka Meghalaya Cooperative Apex Bank, Ummulong u Latu Nartiang, ki nonghikai, ki samla pule bad ki nongshong shnong.
U Prof. Umdor u la pynshlur ïa ki nongïashim bynta ban shim kabu ïa ki lad ban pynïaid iew ïa ki tiar shna kti bad ha ka jngohkai pyrthei.
Ha kane ka sngi la sam ïa ki syrnot sha ki nongïoh jinghikai.
