Shillong, Naitung, 20: Ka Kashari ka la pynjlan sa 14 sngi ban set ha Judicial Custody ïa ka Sonam Raghuvanshi bad ïa u baieid jong ka u Raj Singh Kushwaha.
Ïa ka hukum, la pynmih da u Judge D.K.K. Mihsill ha ka 18 tarik, Naitung, kaba bthah ba ïa ka Sonam bad ïa u Raj, kiba la shah kynnoh ba ki dei kiba donkti ha ka jingdkhat jubor ïa ka jingim jong u Raja Raghuvanshi, ki dang dei ban shong ha Judicial Custody.
Shi sngi shwa kane, ka Kashari ka la pynmih ïa kajuh ka hukum pyrshah ïa ki lai ngut kiba kynthup ïa u Akash Rajput, u Anand Kurmi bad Vishal Chauhan ïa kiba la kynnoh ba ki dei kiba donkti lang ha kajuh ka kynhun Gang ba la ai nong da ka Sonam. Ïa ka jingbishar la pynlong lyngba ka video conference.
Dang khyndiat sngi, ka Kashari ka la ai jamin noh ïa u Silome James, u nongkhaii iing, uba la shah kem lang ha kane ka kam pynïap briew.
U Raja Raghuvanshi, 29 snem ka rta u nongkhaii na Indore, Madhya Pradesh, la lap ba u la shah pynïap ha kawei ka jaka pynieng kali hajan ka kshaid Wei Sawdong ha Sohra ha u bnai Jymmang ha ka jingleit kai Honeymoon bad ka kurim jong u ka Sonam Raghuvanshi sha Sohra.
