Shillong, Naitung 22: Kan long ka khana kaba sngewtynnat hadien ba u Myntri Rangbah u Conrad K. Sangma dalade u la leit jngoh ïa ka ri Japan ban ïakynduh ïa ka kynhun ki Nurse na ka jylla Meghalaya kiba la leit ban trei sha ka ri Japan bad sha ka ri Singapore da ka jingthmu ban pynkylla ïa ka jingim jong ki.
Kine ki Nurse, kiba trei mynta ha Kobe, Japan, ki la dei ki nongsakhi halor ka bor ba la pynkylla ïa ki lad ki lynti jong ki bad kumjuh ruh ïa ka rai ba skhem, ba la ïalam da ki jingïohi jngai ba la sdang da ka sorkar Meghalaya.
Kane ka khana ka la sdang ha u bnai Jymmang 2023, hadien ba ka sorkar ka la pynlong ïa ka Job Fair ha Shillong, da ka jingthmu ban pynïasoh ïa ki nurse kiba donsap na Meghalaya ban leit trei sha ki ri ka pyrthei. Palat 1,300 ngut ki nurse ki la shim bynta kiba la angnud ban pyni ïa la ki jong ki sap. Lyngba kine ki jingïatreilang bad ki karkhana ki ri ka pyrthei, kane ka jingsdang ka la seisoh haba 27 ngut ki nurse ki la ïoh ka lad kaba kyrpang ban ïoh leit trei sha ri Japan, bad kiwei pat ki 18 ki la ïoh ki lad ban leit sha Singapore.
Ha ka jingleit jngoh jong u sha Kobe, u Myntri Rangbah ba la synranlang da ki ophisar na ka tnat Health & Family Welfare ki la ïakynduh ïa ki nurse ban sngap thuh halor ka bha ka miat jong ki. Kane ka kynhun, kaba dei ruh ka Batch baar ki Nurse kiba la trei ha Japan, ki la pynpaw ka jingsarong bad kumjuh ruh ka jingai burom ïa ka jylla.
Napdeng jong ki, ka Laikyrmen Khardewsaw, ka Nurse kaba trei ha Kobe Kaisei Hospital, kaba dei ruh na ka shnong kaba rit ka Umtrewsaw ha Ri Bhoi District ka la ïathuh shaphang kane ka jingleit trei jong ka sha Japan da kaba ong, “ka lynti ïaid napoh ka shnong jong nga sha Japan ka la dap tang da ki jingeh suda, hynrei da ka jingkyrshan U Blei, ka ïing ka sem bad ki paralok, ka la long ka jingleit kaba kmen. Nga la im ka jingim jong nga ha Kobe.”
Kawei pat ka nurse, ka Jenisha Lyngdoh, kaba trei ruh ha Kobe Kaisei Hospital, ka la ong, “Nga ai khublei ïa u Myntri Rangbah ka jylla u Conrad K Sangma bad ka kynhun ka MSSDS halor kane ka jingïoh ka lad ban leit trei sha Kobe. Ka jingïoh ban trei ha ri Japan ka la long ka jingphoh sniew na ka bynta babun na ngi, bad lyngba ki jingkyrshan jong ki, ngi la ïohnong shibun ki jingmad kiba kordor ki ban pynwandur ïa ka lawei jong ngi.”
U Myntri Rangbah uba la shah ktah na kine ki khana jong kitei ki Nurse, u la pynpaw ka jingsngewhun kaba khraw halor ki jingjop ki prokram jong ki. “Ngi sngew kmen ban ïohi ïa ka jingkyrshan napoh ka Kobe Kaisei Hospital. Ki nurse jong ngi ym tang ba ki la lah ban ïadei ïa ka sawdong sawkun ka jaka hynrei ki la long ruh kiba trei shitom. Kane kadei ka kabu ksiar na ka bynta kito baroh kiba angnud ban rah ïa ki sap jong ki sha ka pyrthei,” u la ong.
Na ki shnong barit ka jylla Meghalaya sha ki jaka sumar ka ri Japan, la dei ban ai khublei ïa ka jingïalam ba ïohi jngai jong u Myntri Rangbah u Conrad K Sangma bad kumjuh ruh ka jingrai kut ki nurse, mynta ki la thoh ïa ki khana jingjop jong ki, ha kaba kane kan ai mynsiem ïa kiwei pat ban pynurlong ïa ki jingphoh sniew jong ki, kiba khlem pud.
