Shillong, Naitung, 25: Ki Pulit ka South West Khasi Hillls District ki la kem noh ia uwei u Kpanah bar jylla uba la don kumba 45 snem ka rta uba dei na ka shnong Khudnamari, Dhubri District jong ka jylla Assam halor ka jingkynnoh ba u la leh be-ijot ia la ka jong ka khunruit kaba dang 13 snem ka rta ha kawei ka shnong ha South West Khasi Hills District.
Ka kmie jong ka lanot kaba la ujor ia ka ejahar sha ki Pulit ka la pyntip ba ha 23 tarik, Naitung 2025 ka la ioh jingtip na kawei ka para marjan ba ka khun kynthei jong ka, ka la shah leh be-ijot ha u Kpanah bar jylla bad ynda ka la tohkit na ka khun, ka la phla ba ka la shah leh beijot la kumba 4-5 sien naduh u bnai Kyllalyngkot, 2025.
Ia u Kpanah la kem noh da ki Pulit ha ka 24 tarik, Naitung 2025 bad ha ka jingtohit u la phla ba u la leh ia kane ka kam bymman bad ki Pulit ki la register ia ka case hapoh ka Mawkyrwat Women Police Station C/No. 07/2025 hapoh ka Section 5(l) (n)/6 A jong ka POCSO Act.
Hadien ba la tian bishar ia u, ka Kashari ka la aibor ia ki Pulit ban set 14 sngi ha Police Custody na ka bynta ban ioh pynlong ia ka jingtohkit.
