Shillong, Naitung, 26: Ka District Magistrate jong ka East Khasi Hills District ka Kong Rosetta Mary Kurbah ha ka sngi Saitjaiñ ka la mana tyngeh ïa kino kino kiba pynjaboh ïa ka shilynter jong ka surok Shillong-Sohra bad khamtam ïa ki jaka jngohkai pyrthei kiba don ha kylleng ka nongbah Shillong bad hapoh ka East Khasi Hills District.
“La ïoh pdiang ïa ka jingpyntip ba ka don ka jingpynjaboh da ki nongjngohkai pyrthei ha shilynter jong ka surok Shillong-Sohra bad khamtam ha kiwei kiwei ki jaka jngohkai pyrthei ha kylleng ka nongbah Shillong bad ka District. La lap ba ka don ka jingbret pathar ïa ki jaboh plastik, ïa ki song jingbam bad kiwei kiwei ki jaboh jabaiñ da ki nongwankai ha kane ka jaka ba paw bha ka jngohkai pyrthei, khamtam ha ki Viewpoint,” la pyntip ka District Magistrate.
“Lada ailad ïa kane ka jingbret pathar ïa ki jaboh jabaiñ kan pynjaboh ïa ka mariang, ka ban ktah ruh wat ïa ka jingitynnat bad ka jingkhuid jingsuba jong ki jaka,” ong ka Kong Kurbah.
“Da kaba pyntreikam ïa ka iktiar ba la pynkup ha nga hapoh ka Section 163 BNSS la mana ban pynjaboh ïa ka shilynter jong ka surok Shillong-Sohra bad khamtam ïa ki jaka jngohkai pyrthei kiba don ha kylleng ka nongbah Shillong bad hapoh ka East Khasi Hills District,” la ong ka hukum.
“Kino kino kiba pynkheiñ ïa kane ka hukum kin shah pynshitom hapoh ka Section 223 jong ka BNS bad ha kino kino ki kyndon aiñ kiba i donkam. Namar ka jingkyrkieh jong ka kam, kane ka hukum kan treikam noh mardor tad haduh ban da pynbna da kumwei pat,” la pyntip ka District Magistrate.
