Shillong, Shillong, 26: Ka Parking Lot jong ka Meghalaya Urban Development Authority (MUDA) ha Khyndai Lad, Shillong ka la pynsuk haduh katta katta ïa ki nongdie madan kiba la ïoh ïa ki jaka die jingdie kiba thymmai ba la bhah katkum ka jingpynbeit jong ka Shillong Municipal Board (SMB) kaba la pynlong ïa ki ban lait na ka jingshah ïa ka sngi, u slap bad ka lyer.
Ha ka jingïakren bad ki lad pathai khubor, ki nongdie madan ki la pynpaw ka jingsngewnguh ïa ka Sorkar kaba la pyrkhat kyrpang ïa ka bha ka miat kaba la pynshna da ki dukan die jingdie kiba biang. Hynrei ha kajuh ka por ki la pynpaw ruh ïa ka jingsngewkhia halor ka jingbym don ki jingdonkam ba kongsan ha kane ka jaka die jingdie kaba thymmai.
Ki nongdie madan ha Parking Lot ka MUDA ki la kdew ruh ba kam don satia ka jingpynbiang ïa ka bording, ka umbam umdih kaba biang bad wat ki Fan kiba pynpyngngad na ka jingshit jong ka suiñbneng.
“Ki dukan ki don sha kyndong, ym don um, ym don Fan, ka long kaba sngewsih shibun, khamtam ha ka por ba shit bha mynsngi,” la ong uwei na ki nongdie jingdie.
Ki la kyntu shuh shuh ïa ki bor ba dei peit ban ai ïa ki jingpynbna paidbah bad ki jingpynsngewthuh paidbah kiba biang khnang ba kin kham bun ki nongthied nongpet ba kin dup tip ba la pynkynriah ïa ki nongdie madan sha ka MUDA bad ba kane ka jaka mynta ka la long ka jaka die jingdie kaba la pynbna paidbah.
Ki nongdie madan ki la kyntu ïa ka Sorkar Jylla, ïa ka MUDA bad ïa ka Municipal Board ban peit kyrkieh ïa kine ki jingeh da kaba pynthikna ïa ka jingpynbiang ïa ka um, ka bording, ki Fan, bad ka jingpynbna paidbah kaba biang, kiba donkam na ka bynta ki nongdie madan bad ki nongthied ruh kumjuh.
