Shillong, Naitung, 26: Ka Kong Philahunlang Kharbuli ka la ujor da ka ejahar sha ki Pulit ba la pyntip ba ha ka 22 tarik mynta u bnai ha ka por kumba 4.42 baje mynstep ki briew ki bym lah ban ithuh durkhmat ki la prongtuh ïa ka dukan jong ka ha Mawlai Mawdatbaki, Nongpathaw, Shillong.
Ka la pyntip ba ki runar ki la rong tuh ïa u sikret uba shongdor kumba T. 15,000 hajar, kawei ka synduk thep pisa kaba don ïa ka pisa kaba T. 1,500 bad ar tylli ki klong ba don ïa ka pisa kumba T. 3,000.
Ki Pulit kiba la ïoh jingtip na ki tnat syntiat ha ka 22 tarik mynta u bnai ki la ïoh bat ïa kawei ka trok kaba don ïa u nombar AS-01SC-6510 ha lad 7th Mer, Upper Shillong ba la ñiah da u Bah Banteilang Kharbangar bad na kane ka trok ki la ïoh kurup ar phew wei tylli ki khlieh masi ba la kit khlem ki kot ki sla kiba biang.
U Bah Bobbyland Lyngkhoi u la ujor da ka ejahar sha ki Pulit ba la pyntip ba ha ka shiteng sngi ka 22 tarik mynta u bnai ka thuk thuk jong u kaba don ïa u nombar ML-05T-0816 la lap ba ka la jahrngai najan ka kshaid Amlympiang, West Jaiñtia Hills.
Hynrei ha ka por kumba 4.35 baje janmiet ki Pulit ka Dawki Police Station ki la lap ïa kane ka thuk thuk na khlaw kaba don hajan ka shnong Kharlamin.
