Shillong, Naitung 26: Ka Meghalaya Pradesh Mahila Congress (MPMC) ka la pynpaw ka jingpyrshah kaba jur ïa ka rai ba dangshen jong u Vice Chancellor ka University of Science and Technology Meghalaya (USTM) ban pynbiang ka jaka sumar bad ka jingkyrshan ïa ka pule puthi sha ki khynnah kiba khlem ïing khlem sem bad ki khynnah kiba la kylla shang makia na ki longïing kiba la shah kyndang ha ka sorkar Assam ha kine ki sngi.
Ka MPMC ka ngeit ba kane ka university ka dei ban buh shwa ha khmat na ka bynta ka bha ka miat jong ki nongshong shnong ka jylla bad ki khynnah trai ri trai muluk ka Meghalaya, khamtam eh kito kiba wan na ki longïing kiba tlot ka ïoh ka kot ha ka imlang sahlang, ha shwa ban kner ki lad jingïarap sha kiwei ki briew.
“Katba ngim ju ïeng pyrshah ïa kino kino ki lad jingkyrshan ha ka longbriew manbriew kaba long paidbah, hynrei ngi ngeit skhem ba kum kine ki jingsdang dei ban buh shwa hakhmat ïa ka bha ka miat ïa ki nongshong shnong bad ki khynnah trai ri trai muluk kiba dei na ka jylla Meghalaya, kyrpang kito kiba wan na ki longïing kiba duna bad kiba tlot ka ïoh ka kot kiba dei na ka jaitbynriew Khasi bad kiwei pat ki jaitbynriew riewlum,” ong ka president ka MPMC ka Kong Joplyn Scott Shylla ha ka kyrwoh khubor ha ka sngi Thohdieng.
Na ka liang ka party ka la pynpaw ïa ka jingbym mynjur ba kane ka skulbah ne university, kaba don ha Meghalaya bad kaba ïoh ki lad jingmyntoi napoh kane ka thaiñ ka dei shisha ban pynleit jingmut ban kyntiew ïa ka bha ka miat ki khynnah kiba donkam ki lad jingïarap napoh ka jylla.
Na ka liang ka MPMC ka la kdew ruh ïa ki jingeh ba mad da ki samla trai ri trai muluk ban ïoh ka pule puthi kaba bha, nangta ki lad jingkyrshan pisa, bad ki lad kamai kajih, kiba dei shisha ki kam kiba hakhmat eh ba dei ban pynbeit.
“Ngi kyntu ïa u Vice Chancellor bad ïa ki bor pynïaid kam ka USTM ba kin pyrkhat biang sa shisien ïa kane ka rai bad ban pynthikna ba ka bha ka miat bad ka lawei ki nongshong shnong ym dei ban ïapeiñ ne leh bym suitñiew ha ka kyrteng ka kam ban ïarap ïa ka bha ka miat jong kiwei,” ong ka Kong Shylla da kaba khot ïa ka sorkar jylla bad kiwei ki riew paidbah ba kin shim khia ïa kane ka kam bad ban ïada ïa ki hok bad ki jingangnud jingkhmih lynti jong ki nongshong shnong ka jylla Meghalaya.
