Shillong, Naitung 27: Ka jingïalang ban ïasyllok ban kyrshan ïa ka jylla Meghalaya jong ki Minister of Sports, Secretary Sports, ki nongmihkhmat na ki State Olympic Association na ki jylla North East kiba ïasnohlang ha ka rynsan North East Sports Association (NESA) ha ka 25 tarik mynta u bnai ki la pynpaw ïa ka jingkyrshan ïa ka jylla Meghalaya ban pynlong ïa ka 39th National Games ha u snem 2027.
Ha kajuh ka sngi ka la don ka jingïasyllok ruh bad u u Conrad K. Sangma, Myntri Rangbah ka jylla Meghalaya, uba la shah ai burom bad jingainguh burom da ki nongmihkhmat na ki State Olympic Associations jong ki jylla Arunachal Pradesh, Assam, Manipur, Mizoram, Meghalaya, Nagaland, Sikkim bad Tripura ha ka jingïalang kaba la long ha State Convention Centre, Shillong, halor ka lah jong u ban jingpeit jngai jong u ban pynkhreh ïa ka Meghalaya ban pynlong ïa ka 39th National Games ha u snem 2027.
Ïa kane ka kynhun la lamkhmat da u Bah John F. Kharshiing, Working President jong ka Meghalaya State Olympic Association (MSOA) Secretary General, North East Sports Association (NESA). Ha katei ka jingïalang la sakhi lang ruh da u Kento Jini, Myntri Sports ka Arunachal Pradesh bad u A. T. Mondal, Myntri Bording ka Meghalaya.
Shwa katei ka jingïalang, la pynlong ïa ka jingïalang ba nyngkong eh jong ki Myntri Sports, ki Secretary Sports bad ki nongmihkhmat na ki State Olympic Associations ka thaiñ Shatei Lam Mihngi ha Courtyard by Marriott, Shillong ha ka por 3 baje nohphai sngi, ban ïakren sani bha halor ka jingpynkhreh jong ka Meghalaya ban pynlong ïa ka 39th National Games. Ïa kane ka jingïalang la pynïaid da u Bah Shakliar Warjri, Myntri Sports ka Meghalaya, ryngkat ka jingïadonlang u Kento Jini, Myntri Sports ka Arunachal Pradesh.
Ha kane ka jingïalang, u Myntri Sports ka jylla Meghalaya u la kyntu ïa baroh ki jylla ka thaiñ ban wan shakhmat ban ïatreilang ban pynlong ïa kane ka lympung National Games kaba long kaba khraw tam ka ban long hapoh North East hadien 20 snem. Ka Manipur ka la pynlong nyngkong ha u snem 1999 bad ka Assam ha u snem 2007. Bad hadien ba kitei ki jylla Manipur bad Assam ki la pynlong ïa ka National Games ki la lah ban sei ïa ki Olympian hadien 12-15 snem.
U Dr. Vijay Kumar D., IAS, Commissioner & Secretary, Sports & Youth Affairs, Government of Meghalaya, u la plie ïa kane ka jingïalang da ki kyntien maitphang ban pynshai bad pyntip ïa ka thong jong ka jingïalang. Ki nongmihkhmat na ki State Olympic Associations bad ki heh sorkar na ki jylla bapher bapher ki la ai ïa ka jingkren, jingsngew bad ka jingïaroh ïa ka jingthmu.
Kawei na ki mat ba kongsan tam ka long ka jingtyrwa na ka tnad Sorkar India ka Union Ministry of Home Affairs, Sorkar Pdeng, ba ki 7 tylli ki jylla Shatei Lam Mihngi kin shim bynta da kaba pynlong kawei ka lympung sports ha ka 39th National Games, kum ka dak jong ka jingïatylli bad ka jingïatreilang ha ka thaiñ.
La ai ka jingpdiang sngewbha bad ai burom ïa baroh ki nongwan da u Myntri Sports ka jylla Meghalaya.
La pynwai ïa ka jingïalang da ka jingïasngewthuh jingmut kaba janai bad kaba kyntu ïa ka jingïatreilang. La mynjur ban sa ïakynduh biang shen ban pynkut ïa ki rukom pynïaid bad ki jingpynkhreh halor ka jingpynlong ïa ka National Games ha ki jylla bapher bapher.
Ki nongmihkhmat na ki State Olympic Associations kiba ïadonlang, Er. Taba Tedir, President, Arunachal Olympic Association, u Bamang Tago, Secretary General, Arunachal Olympic Association, u Dhruba Jyoti Kalita, Joint Secretary, Assam Olympic Association, u Hiren Gogoi, Joint Secretary, Assam Olympic Association, u Rachandra Singh, Vice President, Manipur Olympic Association, u Bah John F. Kharshiing, Working President, Meghalaya State Olympic Association, u Bah Finely L. Pariat, General Secretary, Meghalaya State Olympic Association, u V. Lalzawmliana, Secretary General, Mizoram Olympic Association, u Neivikuolie Khatsu, Assistant Secretary General, Nagaland Olympic Association, u Mahindra Dhakal, Joint Secretary, Sikkim Olympic Association, u Sujit Roy, General Secretary, Tripura Olympic Association.
Ki heh sorkar ba ïadonlang na ki jylla Shatei Lam Mihngi ki long, u Abu Tayeng, IAS, Secretary, Govt. of Arunachal Pradesh, u Mohorsii Kashyap, ACS, Deputy Secretary, Govt. of Assam, u N. Praveen Singh, IAS, Secretary, Sports, Govt. of Manipur, Dr. Mayengbam V. Singh, MCS, Director, Youth Affairs & Sports, Govt. of Manipur, u Nyuvitho Nyuthe, Deputy Director, Dept of Sports, Govt. of Nagaland, A. Talie, District Sports Officer, Govt. of Nagaland, Dr. R. B. Biswa, Addl Director, Youth & Sports, Govt. of Sikkim, Dr. Pradeep Kumar Chakravarty, IAS, Secretary, Sports, Govt. of Tripura, u Biplap Kumar Dutta, Dy Director, Youth Affairs & Sports, Govt. of Tripura, u Dikki D. Shira, MCS, Director, Sports Dept., Govt. of Meghalaya, u Bah P. B. War Nongbri, Assistant Director, Sports, Govt. of Meghalaya bad ki District Sports Officers na kylleng ka jylla Meghalaya.
Kane ka jingïalang ka long ka jingïalang ka ban kynmaw kyrpang, kaba pyni ba ka thaiñ Shatei Lam Mihngi ka don ka sap bad ka bor ban pyni ïa ka jinglah jong ka ha ka ri India lyngba ka jingïatreilang ha ka liang ka sports.
La ïoh ka jingkren pdiang sngewbha na u Bah John F Kharshiing, Working President, MSOA bad Secretary General, North East Sports Association ha kaba u la ong, Ka long ka burom kaba khraw bad nga dap da ka jingsngew sarong ban lah ban ai ka jingpdiang sngewbha sha phi baroh kiba wan sha kane ka jingïalang kaba kongsan, kaba la pynlong ban ïakren sani bad pynkhreh ïa ka dur kaba thymmai jong ka 39th National Games 2027, kaba la buh ban pynlong da ka jylla Meghalaya.
“Kane ka jingïalang ka dei ka jingïalang kaba kyrpang bad ka pynsdang ïa ka jingïaid lynti jong ka jingïalong ka bynta jong ka histori, ym tang na bynta ka Meghalaya hynrei na bynta ka thaiñ Shatei Lam Mihngi baroh kawei. Da ka jingai jingmut jong u Myntri Kam Pohïing ka Sorkar Pdeng, ngi long mynta ha ka bynta kaba kyrpang – ban pyni ïa ka jingkhlaiñ, ka jingïatylli bad ka mynsiem sports jong ki phra tylli ki jylla shatei lam mihngi lyngba ka jingïashim bynta lang ha kaba pynlong ïa ki lympung jong ka jingïalehkai ha ka rynsan ri India,” u la ong.
U Bah Kharshiing u la pynpaw ruh da kaba ong ba ka jingmut ban pynlong ïa kawei ne ar tylli ki jingïalehkai ha manla ki jylla ka thaiñ ka long ka jingmut ba kham pher, ban ïa snohkti bad ba ai lad lang ïa baroh. Ka pyni ïa ka mynsiem ka jingïatrei lang kum ka thaiñ bad ka rakhe ruh ïa ka sap bad ka jinglah ha ka sports kaba ka North East ka ju pyni manla ka por.
“Ha kane ka sngi, ngi sngewkmen ban ai ka jingsngewnguh kaba kyrpang sha u Myntri Sports u Bah Shakliar Warjri, halor ka jingïalam lynti bad ka jingkyrshan ban ïaid ryngkat ryngkat, kaba long kaba kongsan bha ha ka jingïaid shaphrang jong ngi ha ka jingpynkhreh bad ka jingpyntrei ïa kane ka kam bah ka ban long hapoh ka jylla ha u 2027. Sha ki nongmihkhmat bad ki heh sorkar tnad sports bad jong ka NESA bad ki jylla bapher bapher ka thaiñ Shatei Lam Mihngi – ka jingïadonlang jong phi ha kane ka sngi ka pyni ïa ka jingïatylli bad ka jingkular ba ngi don lang ban pynkiew ïa ka rukom treikam ha ka sports bad ban pynlong ïa ka National Games kaba yn kynmaw da ki pateng kiba wan,” u la bynrap.
Halor kane Bah John u la ong, “To ngin ïatreilang ban pynlong ïa ka 39th National Games 2027 kum ka jingïatylli, ka jingïakhun ha ka sports, ban ngin ïa rakhe pyni ïa la ki riti dustur bad ka jinglong kyrpang jong ngi kum ki jylla ka thaiñ North East. Sa shisien nga ai ka jingpdiang sngewbha kaba kyrpang da ka mynsiem ba rit, nga ai khublei shibun namar ka jingïashim bynta jong phi ha kane ka jingïalang.”