Shillong, Naitung 27: U MDC ka BJP na Tura u Bernard N Marak u la pynpaw ka jingbym sngewhun halor ka jingpynkut kaba kloi palat ka Ïingdorbar kaba 14th ka Garo Hills Autonomous District Council (GHADC).
U Marak ha u kyrwoh ba la phah sha ki lad pathai khubor ha ka sngi u Blei, u la banjur ka jingdonkam ban khot ka dorbar ba kyrpang ban ïakren halor ki kam ba ïadei bad ka jingbym siew ïa ki tulop ki nongtrei mynta la kumba 43 bnai, ha kaba kane ka la wanrah ka jingeh kaba khraw na ka bynta jong ki.
“Ki nongtrei kumba long mynta ki la mad ki jingeh ban kynduh ïa ki jinglut jingsep kiba manla ka sngi, nangta ban siew ïa ki bai pule bad khamtam eh ban siew ki bai lutksan haba ki pang ki shitom. Ka jingbym lah ka Executive Committee ban pynthikna ïa ki jingïarap ne ban sdang ki jingïasyllok ka la nang pynheh shuh shuh ïa kane ka jingeh jong ki,” ong u MDC ha ka kyrwoh khubor.
“Ha ki dorbar ba la dep, nga la tyrwa bun ki jingai jingmut sha ki Executive Member ban pynmih ïa ki khajna ba bynrap, hynrei kim shym la lah ban leh ïa kane ka kam wat hapdeng kiba bun ki jingtyrwa. Ka jingduna ban khot ïa ka jingïalang jong baroh ki party bad ki jingbym thikna ka jingsam bhah na ka sorkar jylla ka la bynrap shuh shuh ïa kane ka jingdonkam kaba kyrkieh,” ong u Marak da kaba bynrap, “Ka donkam ka dorbar kaba kyrpang ban pynshai ïa kine ki kam, bad ngan kyrpad ïa kane lyngba jong u Lat ka jylla.”
