Shillong, Naitung, 27: Ka Khyndai Lad, kaba la ñiew kum ka jaka pdeng jong ka kolshor bad ka jaka ïaid kjat pyngngad ha ka nongbah Shillong, ka la donkam ïa ka jingïarap kyrkieh na ka Sorkar ban pynitynnad, ban pynkhuid, bad ban kyntiew ïa ka kum ka jaka na ka bynta ki nongtem ki nongrwai bad ki nongshong shnong ruh kumjuh.
U Bah Beningstar Kharpor, u nongshong shnong uba don ka jingsngewkhia ïa ka jinglong jingman jong ka sor, u la pynpaw ba ka Khyndai Lad ka don ïa ka kabu ban pynlong kum ka Music Hub ha kaba ki riewshimet kiba don sap ki lah ban pyni ïa la ki sap.
“Ka Khyndai Lad ka dei ban long ka jaka ban ïaid paidbah, ka jaka ïaid kai bad ban pynpaw pyrthei ïa ki sap ki phong ba ngi don. Ngi kyntu ïa u Bah Paul Lyngdoh ban pyntyllun ïa kane shakhmat bad ban sdang ïa ki sienjam ban pynurlong ong noh ïa kane,” ong u Bah Kharpor.
Haba ai ka jingïaroh kaba khraw ïa ka Sorkar Meghalaya kaba la lah ban pynkynriah ïa ki nongdie madan na surok Khyndai Lad sha ka Parking Lot ka MUDA, u la ong ba kane ka dei ka sienjam kaba khraw ban wanrah biang ïa ka shongsuk shongsaiñ bad ka jingkhuid jingsuba ha kane ka thaiñ.
“Ka jingpynkynriah ïa ki nongdie madan na surok ka la ïarap ban pynduna ïa ka jingkhapngiah bad pynlong ïa ka Khyndai Lad kaba kham suk ha ka leit ka wan. Ka dei ka sienjam kaba dei ban ai jingïaroh ïa ka sorkar,” la bynrap u Bah Kharpor.
Ki paidbah ki la pynpaw ruh ka jingsngewnguh ïa ka Sorkar, khamtam ïa ki bor pynïaid jong ka Shillong Municipal Board bad ïa ka tnad Urban Affairs kiba la lah ban pynkohnguh ïa ki nongdie madan ban kynriah noh narud surok.
“Ngi sngewnguh ïa ka jingpyrshang baradbah jong ka Sorkar bad ngi kyrmen ba kum kine ki kam kin dang ïai kyntiew ïa ka Khyndai Lad kum ka pdeng na ka bynta ka put ka tem, ka jingitynnad jong ka nongbah Shillong,” u la ong shuh shuh.
Baroh ki nongïaid lynti na Khyndai Lad ki la pynpaw ïa ka jingsngewpynngad jabieng ban ïoh ïaid laitluid ym kumba ju long ha ki por ba mynshwa ba ki nongïaid lynti kin ïatakhuh parabriew namar ka kyntur jong ki nongdie madan sha surok ban pynwit wat ïa ka leit ka wan jong ki paidbah.
Ki paidbah ki la kyntu ruh ïa ka Sorkar ba kan thawlad ban pynkynriah lut sa ïa ki nongdie madan ha Motphran namar ka dei ka jaka kaba ju thnem bha da ki nongleit nongwan bad ki nongthied nongpet kiba rung bad kiba mih na Iewduh, ka kad khaii kaba heh tam ha ka jylla.
