Shillong, Naitung, 28: Ka kynhun ai jingïarap jong ka Search and Rescue Team (SRT) ka la ngam haduh 64 phut shapoh ha ka pung Umïam hynrei kam shym la lap ïa ka met jong u samla Pynskhem Kharkrang uba la ngam jyllop ha ka janmiet sngi Saitjain katba ki dang leit sum ha pung Umïam.
Une u samla uba la don 25 snem ka rta, na ka shnong Umroi Nongrah, Ribhoi District, ryngkat bad ki paralok u la leit sum ha pung Umïam hadien ba la wan phai na ka jaka bylla bad mar ïa poi ha pung Umïam u la kynthih ha ka thwei bad u la ngam jyllop syndon jlang.
Ki paralok kiba ïa leit lang ki la pyrshang ban ïarap sei ïa u hynrei kim lah satia.
Ka kynhun SRT ka la pyrshang katba lah ban wad ïa une u samla hynrei kim kotbor shuh namarba ka thwei ka long kaba jylliew bha ba ka tyndong lyer Oxygen ruh kam dap shuh.
Katkum ka jingïathuh jong ki paralok, la ong ba u samla Pynskhem Kharkrang u dei u samla u bym nang ban jngi hynrei kim tip pat ïa ka daw balei u la kynthih ha ka thwei ba jylliew haba um nang ban jngi.
Ban ong ba ka dei ka jingnoh ïap ruh ki ong ba kim lah satia ban ong namarba u dei u samla u bym don jingkhuslai eiei ha ka jingshem jong ki.
