Babu Kular Khongjirem
Katba nang mih ki sngi ki bnai bad katba nang tyllun sha ka General Election 2028, katta, bun ki MLA bad politishian ki la sdang kyndeh shadem bad suh snier jan manla ka sngi bad man ka miet. Ki la sdang wad lad wad lynti bad kheiñ jingkheiñ politics ruh sha kano ka ing ka sem (political party) ban leit swait ban ïoh rung ïing kaba kham pahuh ka ja ka doh bad ki jingbam bang jingbam thiang kyrhai.
Ha kine ki shi snem tam mynta ruh, don haduh kumba lai ngut ki MLA na ka seng Congress kiba la ryngkang dieng kper ban leit rung thymmai noh sha kawei pat ka ïing paki-dulan. Kim ngeit ba ki shah pynngop sha kata ka party ba ïalam ïa ka sorkar (ba ki paidbah kim da mon ne sngewtynnat than) hangne ha Meghalaya da ka jingkyrmen skhem ruh ba ka kam Minister te khlem pep bad khlem artatien shuh kin ïoh beit thik thik mar ïa leit rung. Phewse! Ynda la rung, ym don ba kheiñ briew pynban ïa ki. Lada ki dei makna ba ki dei ban ïoh Minister namarba ki dei bad mihkhmat na ki District bym pat don Minister, hynrei, shisien ba la ngat ha ka jingriam (political trap), mano ban pyrkhat ïa kata ka Seniority ne jinglong District. Ki la shu sah hi mynta tang kum ki MLA ryngkang dieng kper politics(defectors).
Tip shuh haduh katno kata ka ïing thymmai kan phyrnai bad pynphuh pynphieng shisha ïa ka Constituency jong ki,ym lah ong ne ym lah batai ïa kata, tang ki briew jong ka Constituency jong ki, kiba lah ban ai jubab kham bha halor kata.
Hynrei, kaba kham phylla pat mynta ka long ba ynda la ngat ki lai ngut ki MLA Congress, sa uwei biang u MLA Congress ba sah marwei ruh u la kwah leit lang syndon shata.
Ka ktien ki riew stad ka ong, ‘Ngi sngew shngaiñ shibun lada baroh baroh ki ïa liat lang ha kajuh ka thliew”.
Ki nang mut ba ki poi sha ka jaka ba biang bad jaka ba shngaiñ ïa ki ba kin jop suk ïa ka elekshon MLA ha u snem 2028, phewse! kam long satia kaba suk ïa ki ba kin jop suk kumba ki mut dur. Kim tip ba ki la ngat pynban ha ka jingriam kam paidbah ne political trap. Shisien ba la ngat, shitom ban khie khlieh biang sa shisien ïa kajuh ka kam.
Ka apot sepngi ïa ka lawei jong ki (political career) kan long lypa kaba dum hakhmat u paidbah. Shisien, ba U Blei U mut ban pynjot, U da pyn lamwir shwa.
Shisien ba la bakla kheiñ jingkheiñ (mis-calculation), lah eh ban pynmih soh (uncertain for further success).
Kaba kham ma kalong ba ïoh ka dei pynban ka jingpynjot hi da lade ïalade (self political sucide). Namar ha ka jingkwah briew jong ngi,kam ju urlong satia kumba thmu. Mut ïa kaba bha, poi sha kaba sniew bad mut ïa kaba dei, poi pynban shaba lait.
Ki paidbah ki la sdang ïalap ne ïathuhkhana te mynta khyndiat khynsoit shaphang ka General Election 2028 jong ka ïingdorbar Thawaiñ ha ka Jylla.
