Shillong, Naitung, 31: Ka Meghalaya Pradesh Mahila Congress (MPMC) ha ka sngi Palei ka la pynrem jur ïa ki jingpharep bad kem jubor bad jingpynngat kyndon aiñ ïa ki ar ngut ki Sistar ka Balang Catholic na ka jylla Kerale, kata, ka Sister Vandana Francis bad ka Sister Preeti Mary ha ka jylla Chhattisgarh.
“Kane ka jingjia ka long kaba be-aiñ bad ka dei ruh ka jingpynkulmar jingmut bad jingpynshitom ïa ki ritpaid riewngeit Khristan ha ka ri India,” ong ka President jong ka Meghalaya Pradesh Mahila Congress (MPMC) ka Kong Joplyn S. Shylla ha u kyrwoh ba la phah sha ki lad pathai khubor.
“Ka MPMC ka dawa ïa ka Sorkar jong ka Jylla Chhattisgarh bad ki bor Sorkar Pdeng ba kin pyllait noh mardor ïa ki ar ngut ki Sister bad ban shimkhia ïa kane ka kam da ka jingtohkit kaba khuid bad kaba hok. Kane ka jingjia ka dei ka jingpynher syrngiew ïa u paidbah bad kaba pyrshah ïa ka synshar paidbah ha ka ri India,” ong ka MPMC.
Ka MPMC ka kyntu jur ïa baroh ki kynhun niam Khristan kynthup lang ïa ka Balang Catholic, Presbetarian bad kiwei kiwei ba kin mih paidbah bad pynpaw ïa ka jingpyrshah jong ki da ka lynti kaba jaijai na ka bynta ban pyllait noh ïa kine ki arngut ki Sister ba dang shah set along.
“Ka jingshong kli kti ha kum kane ka por ka pynlong ïa ki nonglehkam bymman ban nang trei shitom bad pynkulmar shuh shuh ïa ka imlang ka sahlang,” la bynrap ka MPMC.
“Ka MPMC kan ïai bteng ban ïengskhem bad pyni bor lang bad ki paid Khristan bad kan ïai dawa ïa ka hok bad ka jingshisha tad haduh ba ki ar ngut ki Sister kin ïoh ïa ka jingbishar hok,” la pynkut u kyrwoh.
