Shillong, Nailar 01: U Bah AL Hek uba long u nongïalam ka BJP bad u Myntri ka sorkar jylla ha ka sngi Thohdieng u la kyrpad ïa ka jingtuklar lem jong u Myntri ka tnat Kam Pohïing ka Sorkar Pdeng ban pynkutnoh ïa ka jingthombor ïa ki Khristan ha Chhattisgarh.
Ha ka shithi ba la phah sha u Amit Shah u Hek u la ong, “da kaba sngewrit bad da kaba burom nga kyrpad ïa ka ophis badonburom jong phi ban tuklar bad ban ïada na ka jingshah thombor kaba ktah ïa ka dohnud bad ka mynsiem ki Kristan ha jylla Chhattisgarh.”
Haba phai sha ka video ba la saphriang dangshen, u Myntri ka sorkar jylla u la ong ba kawei ka briew kaba la khot da ka kyrteng ka Jyoti Sharma la ïohi ba ka la leh kum ka nongtrei kaba la ïohbor ban pyntreikam ïa ka aiñ dalade, ka la talasi ïa ki pla bad byrngem ruh ïa ki sister, katba ki pulit ka jylla ki shu ïapeit kai. U la kynnoh ba katei ka briew ka la thap ruh ïa u pastor, hakhmat jong ki pulit.
“Kum kane ka jingleh na ka liang jong ka, ka la ktah bha ïa ka jingsngew jong ki khristan kiba ieid ïa ka jingsuk ha kylleng ka ri baroh kawei,” u la ong.
U Bah Hek u la ïathuh ba u la dep ban ïakren lyngba ka phone bad u Myntri Rangbah ka jylla Chhattisgarh bad la phah ruh ka shithi ha ka 29 tarik u Naitung, 2025 haba la kyrpad ïa u ban pynlait noh mardor ïa kitei ki arngut ki sister.
“Ngi kyrpad ïa ka jingtuklar ba shimet jong phi ban pynthikna ban pynlait noh ïa kitei ki sister ka Balang Catholic kiba la shah kem bad shah set patok ha Chhattisgarh bad ba dei ban pynshitom ruh ïa ka Jyoti Sharma halor ki jingleh jong ka, kaba la wanrah ka jingpynlehraiñ ïa ki klur ngut ki riewngeit Hindu kiba ieid ïa ka shongsuk shongsaiñ jong ka ri baroh kawei,” pynpaw ka shithi ba la thoh u Bah Hek.
