Shillong, Nailai, 02: Da ki spah ngut ki riewngeit Hindu shynrang bad kynthei ha ka step sngi Saitjaiñ ki la mih na Mahadev Khola, Shillong ban sdang ïa ka jingïaid yatra sha ka krem Mawjymbuiñ kaba don ha ka shnong Mawsynram, East Khasi Hills District.
Ïa kine ki riewngeit Hindu la synran lang da ki Pulit jong ka East Khasi Hills District khnang ban ai jingpahara ïoh ba ka lah ban mih kano kano ka jingjia basngewsih katba ki dang ïaid ïa ka lynti ban poi sha ka shnong Mawsynram.
Katkum ka jingtip ba la ïohlum, kine ki riewngeit Hindu kin sah miet shwa ha ka shnong Phanñiewlah ba la pynkhreh kyrpang bad nangta kin sa bteng biang ïa ka jingïaid lynti ka jong ki ha ka sngi u Blei haduh ban da poi ha Mawsynram.
Dang shen ka Iingbishar Meghalaya High Court ha ka hukum ba la pynmih ka la bthah ïa ki riewngeit Hindu kiba leit yatra ba kim dei satia ban leh puja ne ban theh dud hapoh ka krem hynrei la bthah ba kin shu synreit tang da ka um ïa u mawjymbuiñ uba don hapoh ka krem.
