Shillong, Nailar, 03: Ka Meghalaya and Greater Shillong Progressive Hawkers and Street Vendors Association (MGSPHSVA) ka la phah haduh kumba sawtylli ki dorkhas kiba bniah, ryngkat bad ki jingpynshisha sha u Special Officer jong ka Meghalaya High Court, u Chairperson ka PTVC bad ka Deputy Commissioner jong East Khasi Hills.
“Ha kine ki dorkhast la kdew shai ïa ka jingleh be-aiñ bad ka jingpynkheiñ ïa ki kyndon jong ka Aiñ, (The Street Vendors Protection of Livelihood and Regulation of Street Vending Act 2014), da ka Shillong Municipal Board ha ka por ba ka pynkynriah jubor ïa ki nongdie madan ha Khyndai Lad ha ka 23 tarik, Naitung, 2025,” ong u kyrwoh ba la phah da u General Secretary u Bah Shane Thabah.
“Ïa ka jingpynkynriah ïa ki nongdie madan ha Khyndai Lad la rai bad leh tang da ka ophis jong ka Shillong Municipal Board marwei, khlem ka rai ne ka jingïakynjoh ktien lang ha ka Provisional Town Vending Committee lymne bad ki nongdie madan. Kumta kane ka jingleh jong ka Shillong Municipal marwei kam long kaba shongnia, shongaiñ, kam long kaba beit bad ka bym shong hok. Ha kane ka jingleh donbor bad jingleh be-aiñ jong ka Shillong Municipal Board, la don shibun ngut ki nongdie madan kiba shisha bad kiba ladep ban shah ïa ka in situ survey ne ka jingjurip, kiba khlem ïoh ïa ki Certificate of Vending (CoV) bad ki la duh ei ïa ka kamai jakpoh. Kane ka la ktah jur ïa ka jingim jong ki bad kine mynta ki don hapdeng ka jinglynga bad jingdukha mynsiem kaba shyrkhei. Kumta ka seng ki nongdie madan ka buh ki jingkylli bad jingartatien halor ka jingleh jong ka Shillong Municipal Board bad ka dawa jur ba dei ban tohkit bad pynbeit mardor ïa kane ka kam. Ka Shillong Municipal Board ka dei ruh ban buria ïa ka jingduh kamai jakpoh jong kine ki nongdie madan kiba la duh ka kamai kajih,” ong u kyrwoh.
Haduh mynta kam pat shym don ka jingpynbeit ne ka jingpyrshang ban pynbeit ïa kine ki kynrum kynram bad ba ka Provisional Town Vending Committee ruh kam pat shym la lum ïa ka jingïalang. Namarkata ka daw, ki nongdie madan kim don shuh da kawei pat ka lynti lait sa tang ban pynlong da ki jingïakhih hakhmat ka ophis jong ka Shillong Municpal Board ha ka 1 tarik mynta u bnai.
Ka MGSPHSVA ka pynpaw lyngba ki kot ki sla bad ki sakhi kiba khlaiñ bad dawa ruh ban pynbeit mardor ïa ki kynrum kynram kiba ka Shillong Municipal Board haduh mynta kam pat lah ban pynmih paidbah ïa ka thup kyrteng jong ki nongdie madan kiba la dep shah survey bad kiba la dep ban pynshisha, kumba la hukum da ka High Court.
Ka Shillong Municipal Board kam pat lah ban sei ne pynbna paidbah ïa ka thup kyrteng jong ki nongdie madan kiba la shah survey bad kiba la dep pynshisha kumba la hukum da ka High Court.
Ka thup kyrteng ba la pynmih da ka Shillong Municipal Board, ka dap da ki jingbakla suda ha kaba ki nongdie madan kiba shisha bad kiba la dep ban shah survey ki khlem mih kyrteng, katba kiwei pat ki bym dei ki nongdie madan ki ïoh ïa ka CoV.
Ïa ka notis ban pynkynriah ïa ki nongdie madan ha Khyndai Lad, la phah ha ka step phyrngab jong ka 23 tarik, Naitung, 2025 (wat u syiar ruh um pat khie thiah) lyngba ka WhatsApp bad ki nongdie madan kim shym la ïoh por ban pynkhreh na ka bynta kata ka kam pynkynriah jaka shong die jingdie.
Ka jingpynkynriah ka la ïaid shakhmat khlem ka jingpynkhreh ne ka jingpynbit pynbiang ïa ka thup kyrteng. Kumta kane ka long be-aiñ bad ka dei ka kam beiñ hukum.
Haduh mynta ka jaka ha Parking Lot MUDA ha kaba la pynkynriah ïa ki nongdie madan ka long ka bym bit bym biang bad ka bym shngaiñ. Ha ka sngi ba la pynkynriah bad ki sngi kiba bud, ka jingpyntrei ïa katei ka jaka ka dang ïaid shakhmat bad ka la long ka jingeh bad jingiwit ïa ki nongtrei bad ruh ïa ki nongdie madan. Haduh mynta kane ka jaka kam don ki paiñkhana, ka um bam umdih, ka jaka bret ïa ki jakhlia, ka bording kaba shngaiñ bad kumjuh ka kudam buh tiar.
Ki jaka shong die jingdie kim long kiba bit bad la shna torti ïa ki khlem ka jingïakynjoh ktien bad jingïarai lang ha PTVC.
Ka jaka shong die jingdie hapoh MUDA Parking Lot ka long ka jaka kaba shlei um ha ka por slap bad kane ka ktah jur ïa ka die ka thied bad ka koit ka khiah jong ki nongdie madan.
Ha ka jingshisha na ka liang ka MGSPHVA ka la pynkhreh ban tyrwa bad buh ïa ki kyndon ne ka rukom pynbeit kumno ban pynkynriah ïa ki nongdie madan ha Khyndai Lad khnang ba kan long kaba ?aid beit bad khamtam eh ba kan ym ktah ïa ka kamai jakpoh jong ki nongdie madan.
Kaba pynmih jingkulmar eh ka dei ka jingpynkhalai nusib na ka bynta ki jaka shong kaba khlem pat ïakren ne rai ha ka PTVC. Kane ka pynpaw ba ka rukom treikam jong ka Shillong Municipal Board ka long kaba thurmur bad la shu leh tang dep bad kam don ruh kano kano ka rukom ai jingkheñ bad ba kumno yn weng ïa ki jingeh kiba ki nongdie madan ki shem ne duh ïa ki CoV.
Kumba 106 ngut ki nongdie madan kiba shisha kiba la dep shah survey hynrei kiba khlem ïoh ïa ki License. Mynta kine ki nongdie madan ki la duh ki jaka shong die jingdie bad ki la duh ka kamai jakpoh. Ki nongdie jingbam ïa kiba la pynbeit ba kin die ïa ki jingbam ha ka lynti hakhmat ka MUDA Complex, mynta pat la thynngian bad thep jubor ïa ki shapoh MUDA Parking Lot. Kane ka jaka kaba ki die mynta ka long ka bym biang bad ka bym koit bym khiah.
Ka MGSPHSVA ka buh ïa kine ki jingdawa bad ka kyntur jur ïa ka Shillong Municipal Board bad ka tnat Urban jong ka Sorkar Jylla ban shim khia bad pynbeit mardor ïa kine ki kynrum kynram bad weng ïa ki jingeh baroh ba ka Provisional Town Vending Committee ka dei ban lum kyrkieh ïa ka jingïalang jong ka khnang ban ïakren bad ïatai halor ka jingpynkynriah jubor bad jingleh be-aiñ jong ka Shillong Municipal Board bad ban pyrkhat kumno ban leh nangne shakhmat khnang ban lait na ki jingeh. Ka Provisional Town Vending Committee ka khlem shong jingïalang shuh naduh ka 23tarik, Jylliew, 2025. Mynta la pynbeit ba ka PTVC kan long ha ka 6 tarik, Nailar2025, hadien ba ki nongdie madan ki la leit tur sha ophis jong ka Municipal bad dawa ban pynlong ïa ka PTVC.
Ban pynwandur thymmai ïa ka bynta jong ka Khyndai Lad naduh na Khyndai Lad haduh Lynti Umsohsun kumba la ïakren bad rai ha ka PTVC mynshuwa.
Ban pynwandur thymmai bad shna biang ïa ki jaka shong jong ki nongdie jingdie kiba la kynriah mynta ha MUDA Parking Lot.
Ban sam noh ïa ki CoV sha baroh ki nongdie madan kiba shisha bad kiba la dep shah survey. Ha kajuh ka por ba leh biang mar mar ïa ka survey halor kito kiba la shah iehnoh bad kiba khlem ïoh license.
Ban thaw mardor ïa ki kyndon na ka bynta ki jingpynbeit ïa ki nongdie madan bad ruh ban thaw ïa ka kynhun ne ka tnat ka ban peit ïa ki jingujor bad ki jingeh ba ki nongdie madan ki ïashem ha ka por ba pynkynriah jaka ne ha ka por ba pynbeit ïa ka rukom shong die jingdie jong ki. Nalor nangta, baroh ki thup jingtip kiba ïadei bad ki nongdie madan dei ban pynmih bad sam paidbah.
Dei ban ïathuh bad pynmih paidbah halor ki jinglut jingsep, kaba kynthup ïa ki contractor kiba ïoh ban pyntrei ïa ka kam shna ïa ki jaka shong die jingdie ha MUDA Parking Lot.
Dei ban thaw ruh ki kyndon ban pyrkhing bad khanglad ïa ka jingdie pateng ïa ki license bad ïa ki jaka shong die jingdie.
Ka jingpynkynriah jubor ïa ki nongdie madan, ym dei tang ba ka pynkheiñ ïa ka aiñ ne ka beiñ ïa ka hukum jong ka High Court, pynban ka shat phalang ïa ka jingthurmur ne jingmutlop jong ka treikam treijam ha ki tnat sorkar, kum ka Shillong Municipal Board. Ym tang katta, ka dei ruh ka jingleh thombor bad ka jingkynjat ïa ka pliang ja jong ki rangli ki juki.
Kumta ka MGSPHSVA ka pynrem jur bad ka kyntait ïa kane ka jingleh be-aiñ jong ka Shillong Municipal Board kaba la ktah jur ïa ka ïap ka im jong ki spah tylli ki longïing. Mano ban bah khlieh ïa ki jingeh kiba kine ki nongdie madan, khamtam kito kiba dei hok bad kiba duh ïa ki CoV? Mynta kine ki nongdie madan ki duh thiah duh dem, ki lynga ki pisa jingmut bad lehse ki lah ruh ban ïoh ïa ki jingpang kiba lah ban ktah ïa ka bor pyrkhat jong ki.
Ngi pynkynmaw ruh hangne ba kawei ka bynta ba kongsan ba ki nongdie madan ki dei hok ban ïoh katkum ka Aiñ, ka long ban ujor ïano ïano ba ki tip shai ba kim dei hok ban ïoh CoV bad ban kam kynti ïa la ka jong ka hok (claims and objections). Ha kaba ïadei bad ki nongdie madan kiba shong die jingdie naduh Khyndai Lad haduh Lad Umsohsun ki la ïoh ban leh kumta hapoh ka jingkhmih jong ka PTVC.
Kaba sngewkhia pat ka long ban tip ba ki nongtrei ka ophis Shillong Municipal Board lyngba ka telephone ki khot bad wer ïa kiwei pat ki nongdie madan kiba shong die jingdie ha kiwei pat ki bynta jong ka nongbah Shillong ban kin wan shim ïa ki CoV. Kane ka dei ka jingleh be-aiñ namar ha kiwei ki jaka jong ka nongbah Shillong ym pat shym la pyndep ïa kane ka bynta ba ki nongdie madan kin kam kynti bad ban ujor (claims and objections), la kynnoh ka MGSPHSVA bad dawa ba dei ban sangeh shi syndon ïa kane ka kam be-aiñ.
Ka MGSPHSVA ka ban jur bad dawa ba dei ban pynbeit mardor ïa ki kynrum kynram bad weng ïa ki jingeh. Shuh shuh ba nangne shakhmat dei ban kynjoh ktien bad ïarai lang bad ki nongdie madan ha shuwa ban shim ïa kino kino ki sienjam. Lym kumta ka Seng kan ym shong thait ban dawa ïa ka hok, la pynkut u kyrwoh.
