Shillong, Nailar, 03: Ka jingbuh ïa ka jingker nar ha surok jingkieng Damside ka la pynthut haduh katta katta ïa ka kamai kajih jong ki nongrep ha ka jylla Meghalaya. Ki mar rep kum ki jhur bad ki soh ki bym poi shuh ha ka por kaba biang sha ki jaka iew ka la wanrah pat ïa ka jingkiewdor bad ka jingsep ei ki mar rep, na ka daw ba ki kali kit mar ki kyntait mardor ban kit ïa ki mar rep da kaba ïaid ïa ka surok ba khongwaiñ.
Ka Farmers’ Market kaba don ha 5 Mer, Upper Shillong ba la shna da ka Sorkar Jylla ban pynmyntoi hi ïa ki nongrep trai jylla ka la ïakynduh mawsiang. Kane ka iew kaba ju long kawei na ki iew die lang kaba jur bha ban shalan ïa ki mar rep ba la wanrah na kylleng ka ri Khasi bad Jaiñtia, hynrei na ka daw ka jingbym shah ïaid shuh ïa ki kali kit mar kiba heh na surok lyngba ka jingkieng Damsite ka la pynlong mynta ïa ka iew kaba shu sah thylli kreng kreng bad ïa ki mar rep la shu pynlang hajuh na ka daw bym lah shuh ban die.
“Naduh ba la shna ïa ka jingker nar ha ka jingkieng Damsite, ki kali ki la sangeh ban wan kit ïa ki mar rep ba ngi la pynmih. Ngi la hap ban ïaid na ka surok kaba jngai bad kaba kyllaiñ, nalor ka bai kit ruh ka kiew dor bha. Tengteng ngi la hap ban shu bret noh shiteng lynti ïa ki jhur namarba ngim don lad shuh ban die ïa ki,” ong uwei na ki nongrep na ka thaiñ Mawryngkneng.
Ki paidbah nongshong shnong ki pynpaw ba ka jingshna ïa ka jingkieng Damsite ka dei ka lad kaba paka tam, hynrei ka jingkhang syndet ïa ki kali kit mar kiba heh da kaba bthah ban ïaid na surok Bypass ban wan sha Shillong bad Upper Shillong ka la ktah haduh katta katta ïa ka bai kit bad kumjuh ruh ka la ktah haduh katta katta ïa ka kamai kajih jong ki nongrep bad kumjuh ruh ïa ki nongkhaii.
Bun na ki nongdie mar bad na ki nongkit mar ki la kam ba ka Sorkar ka la phiel ban wad da kiwei pat ki sienjam kaba ailad ïa ka leit ka wan jong ki kali shwa ban khang ïa ka surok. Kane ka la pynduh mynsiem ïa ki nongkhaii, bad wat ïa ki trok bad ïa ki Bos kiba kit ïa ki nongleit jingleit na Assam na ka jingbym shah shuh ban ïaid na surok jingkieng Dam.
“Ka bai kit bai bah ka la kiew. Ki mar rep kim poi sha iew. Ki Bus Night Super bad kiwei kiwei ki kali ki la sangeh ban treikam. Wat ki Bos na ka jylla ruh ki kiar ban ïaid na kane ka lynti,” la ong uwei pat u nongrep uba shah ktah.
Kane ka jingkhang ïaid ïa ki kali heh ka la pynthut ruh ïa ka jingshalan jong ki mar rep na Meghalaya sha Assam. Namarba ka suk ha ka leit ka wan na ka jylla Arunachal Pradesh, mynta ka Assam ka la phai khmat ban thied noh ïa ki mar rep na kane ka jylla.
Ki kali kit mar kiba heh kum ki trok kiba kit 9 ton bad ki Bos ki shem jingeh ban ïaid lyngba ka jingkieng Umïam bad ban poi sha ki jaka ba jngai kum ha Mawryngkneng ka la nang buh jingeh.
Ki kynhun nongrep, ki nongkhaii bad ki nongïalam shnong ki la dawa na ka Sorkar ba kan weng noh ïa ka jingkhang lane ban shna da kawei pat ka surok kaba kham jan kaba pynsuk ïa ka kit ka bah ha ka rep ka riang.
Dang shen, ki nongrep ki la tur sha Secretariat ban pynibor ïa ka Sorkar namar ka jingbym lah shuh ban pynïaid iew ki mar rep na rilum Khasi bad Jaiñtia shabar ka jylla.
