Shillong, Nailar, 04: Ka kynhun State Disaster Response Force (SDRF) ha ka Lah Sngi u Blei ka dang ïai bteng ban wad ha ki bynta jong ka Sella Wari, hajan Tura, West Garo Hills ban lap dien ïa uwei u ophisar ophis Agriculture uba la tip kyrteng kum u Teseng M. Sangma uba la shah rong ha ka umsaw ha ka por shiteng sngi jong ka Sngi u Blei katba u dang pyrshang ban jam ïa ka wah Ganol.
U kyrwoh ba la phah da u Senior Staff Officer & Addl. PRO Directorate of Civil Defence & Home Guards Bah P.H Shylla u la pyntip ba ka kynhun SDRF ka la sdang wad ïa uba jah naduh hynnin ka sngi ryngkat ka SAR jong ki Police bad ka tnat Fire and Emergency Services ha ka por 4:00 baje janmiet da ka jingpyntip jong ki bor synshar ka West Garo Hills District.
Ka kynhun ka la sangeh ïa ka jingwad tad haduh ka por 7:00 baje janmiet na ka daw ba ka bneng ka la dum bad mynta ka Lah Sngi u Blei la bteng biang ban wad naduh ka por 8:00 baje mynstep sha ki bynta ba sharum jong ka wah ha Pelga Wari.
Katkum ka jingïathuh jong u Deputy Controller ka Civil Defence, West Garo Hills u Timai K Sangma uba lamkhmat ïa ka SDRF ka jingwad ïa u ophisar uba jah ka dang ïai bteng haduh mynta.
