Shillong, Nailar, 05: Ka Iingdorbar Thawaiñ jong ka jylla ka la pynpaw ïa ka jingsngewsih kaba khraw halor ka jingkhlad noh jong u Lat barim ka jylla Meghalaya u Satya Pal Malik ha ka sngi Balang ha ka rta kaba 79 snem, hadien ka jingban ka jingshitom kaba la slem bha.
U Satya Pal Malik u la shakri kum u Lat ka Meghalaya naduh ka 18 tarik, Risaw, 2020 haduh ka 3 tarik, Risaw, 2022.
La kha ïa u Malik ha ka 24 tarik, Naitung, 1946, u dei u riewstad ba pawnam jong ka ri India uba la shakri kum u Lat jong ka jylla Bihar, Odisha, Jammu & Kashmir, Goa, bad Meghalaya.
Kum u briew uba aiti khlem thait ha ki kam shakri paidbah, u Malik u la kren bha ïa ki mat kiba ïadei bad ka bha ka miat jong ki nongrep, ha kaba u la ïoh ïa ka jingburom ha kylleng ki bynta jong ka saiñpyrthei.
Ha ka kyrwoh sngewlem ba la pynmih da ka Iingdorbar Thawaiñ ka la ong, “u nongïalam uba rit mynsiem, uba sbun bad uba don ïa ki nongrim, yn kynmaw ïa u Malik namar ka jinglong ba janai jong u, ka jingjylliew jingtip bad ka jingshlur jong u ban kren halor ki mat kiba kongsan ha ka ri. Wat hapdeng ka jinglong kaba jemnud jong u, hynrei u la don ïa ka jinglong kaba stad kaba buh dak ha baroh kiba la ïoh ïa ka kabu ban ithuh ïa u.”
U Lamphang ka Ïingdorbar Thawaiñ u Thomas A Sangma bad ka Meghalaya Legislative Assembly Secretariat ki la pynpaw ïa ka jingsngewlem sha ka longïing jong u Malik bad ka buh jingduwai ruh ba U Blei badonbor baroh Un ai ka bor bad ka jingpyntngen ïa ki ha kum kane ka khep jong ka jingsngewsih.
