Shillong, Nailar 06: Ki Deputy Commissioner jong ka East Khasi Hills District, Ri-Bhoi District, West Jaiñtia Hills District bad East Jaiñtia Hills District ki la pyntip paidbah ba ka Sorkar Jylla lyngba ka National Highways and Infrastructure Development Corporation Limited (NHIDCL), ka donkam jaka ban shna ïa ka surok 4-Lane Greenfield Alignment (High-Speed Corridor) ka ban ïaid lyngba ki shnong kiba hap hapoh kine ki District.
Lyngba ka jingpynbna ba la pynmih da ka Deputy Commissioner ka East Khasi Hills, ki shnong kiba ka surok kan ïaid lyngba ki long ka Mawsiatkhnam, Mawpdang (Mawkhanu), Lumkseh, Diengpasoh (Jaroit), Lum Diengsai, Mawryngkneng (Mawiong Sngi) bad Nonghali.
Ha ka jingpynbna ba la pynmih da u Deputy Commissioner jong ka Ribhoi District la pyntip ba ki shnong ki kynthup ïa ka: Pyllun, Sumer Umbang, Lum Sohpet Bneng, Umeit, Umdohbyrthih, Umroi Madan, Umroi Laban Saro, Sylei-U-Lar, Umsawriang, Nongrah, Umktieh, Lum Dait Khla, Nonglakhiat, Umsarang, Lum Sohphoh, Wah Myntait.
Katkum ka jingpynbna ba la pynmih da u Deputy Commissioner ka West Jaiñtia Hills District ki shnong ki kynthup ïa ka Saw Shnong -(Larnai,Thadmusem,Sohphoh and Nongkhroh)Larnai, Thadmusem, Sohphoh, Kdohkule, Wahïajer, Mukhla, Umlangshor, Mukhla Sohshrieh, Mukhla Nongrim, Mookaswan, Nongbah, Pasyih bad Thadmuthlong.
U Deputy Commissioner jong ka East Jaiñtia Hills District u la pyntip ba ki shnong ki kynthup ïa ka: Tuber Sohshrieh, Tuber Kmai Shnong, Wapung Shnong, Wapung Skur, Lad Rymbai Datsimpeiñ, Mookhep, Lad Rymbai-B, Dkhiah West, Dkhiah East, Khliehriat East, Rymbai, Umsatai, Pynurkba, Bataw, Lakadong Umlatdoh, Lakadong Ummat, Lama, Borghat, Natbor, Deiñ Satlang, Kwator, Demlakang, Ladwahwapung, Hingaria, Huroi, Lahaleiñ, Lejri, Borsora, Kuliang, Umkiang, Lum Phyllut, Dona Skur, Dona Umbluh bad Ratacherra.
Ha ki jingpynbna, ki Deputy Commissioner ki la pyntip kino kino ki jingtei thymmai kiba hap hapoh ki jaka ban ïaid ka surok 4-Lane ki dei ban ïoh jingbit shwa na ka ophis treikam jong ki Deputy Commissioner.
Ki la ong ruh kino kino ki jingtei lada ki dei kiba shipor ne kiba pura kiba shna khlem da ïoh jingbit wat hadien ba ladep ban pynmih ïa ka jingpynbna, kin ym ïoh shuh ïa ka jingsiew bailutksan ha ka por ban pyntrei ïa kane ka project shna shurok bad kane kan treikam ha baroh ki jaka jong ki riewshimet ne ki jaka khaïi.
Kane ka hukum kan treikam noh mardor naduh ka sngi ba la pynbna paidbah.
