Shillong, Nailar, 06: Ka Iingbishar Meghalaya High Court ka la pynpaw ïa ka jingsngew hun halor ki sienjam ba ka Sorkar Jylla ka la lah ban tem ïa ka jingjyllei jong ki ksew surok ha kylleng ka jylla.
Ka division Bench kaba kynthup ïa u Chief Justice IP Mukerji bad u Justice W. Diengdoh ha ka hukum ba la pynmih ha ka sngi Balang hadien ba la shong bishar ïa ka PIL ka la ong, “ngi sngewkmen ban ïohi na ka kaiphod ba la aiti ha ka Ïingbishar mynta ka sngi ba la shim khia ïa ka sienjam kaba kongsan da ka Sorkar ha kaba ïadei bad ka jingma na ka jingjyllei ba isaitmet jong ki ksew surok.”
La thaw ïa ki Committee hapoh rule 4 jong ka Animal Birth Control (Dogs) Rules, 2001 ha baroh ki district kiba kynthup ruh ïa ki ar tylli ki district, ka South Garo Hills bad ka West Jaiñtia Hills.
Ka Bench ka la pyntip ruh, “shuh shuh, ka paw na ka kaiphod bad na ki jingai jingmut jong u Additional Advocate ba la buh ïa ki Camp da ka sorkar, ki jingai dawai injek tika ïa ki ksew surok ban ïada ïa ka jingpang Rabies, ban pynduh khun ïa ki bad ban buh ïa ki ha ki jaka ri kyrpang katba lah ban dup lah ban pynïakhlad na ki briew. Ka jingpynrung kyrteng ïa ki ksew ba ri ha iing ruh ka dang ïaid shakhmat.
Ka Iingbishar ka la bishar ïa kane ka kam bad ka la pynmih ïa ki hukum ban pynthikna ïa ka jingpyntreikam hok ïa ka aiñ Prevention of Cruelty to Animals Act, 1960 bad ïa ka Animal Birth Control (Dogs) Rules, 2001.
U nongmudui, Kaustav Paul, la shah ba un thep ïa ka Affidavit kaba jubab ïa ka kaiphod jong ka Sorkar haduh ka 25tarik Nailar, 2025.
Ïa ka PIL yn sa shong bishar biang ha ka 28 tarik, Nailar, 2025, bad ka Iingbishar kan sa pynkut noh ïa kane ka jingujor da kaba bishar sani ïa ka kaiphod na ka Sorkar bad ïa ka jubab na u nongmudui.
