Shillong, Nailar 11: Da ki phew ngut ki nongdie madan ki la bteng ban pynlong da ka jingïakhih rah plakad ba khlem pud sngi ha Khyndai Lad bad ka jingshong shah thngan ban dawa ïa ka Shillong Municipal Board (SMB) ba ka dei ban ai noh ïa ka Certificate of Vending (CoV) namarba la dap shi bnai pura ki nongdie madan ki bym pat ïoh ïa ka Certificate of Vending kim pat ïoh jaka shong die jingdie ha kano kano ka jaka.
Dang shen ki nongdie madan kiba la ïoh ïa ka CoV ki la leit kynriah sha ki dukan thymmai ba la pynshna kyrpang da ka Sorkar Jylla ha Parking Lot, Meghalaya Urban Development Authority (MUDA).
Ha ka jingïakren bad u nonglum khubor jong ka Batesi TV ha ka Lah Sngi u Blei, ki nongdie madan ki la ong ba kim banse ban pynlong ïa ka jingïakhih shah thngan ban pynbor ïa ka Municipal ban ai noh ïa ka ka Certificate of Vending namarba ki la ïapthngan na ka daw ba kim pat ïohlad ban shong die jingdie. Haba kylli, ki la ong ba kin dang ïai bteng ban pynlong ïa ka jingïakhih ba khlem pud sngi ha Khyndai Lad katba kim pat ïoh ïa ka CoV na ka Municipal.
“Ngi la shong die jingdie harud surok da ki phew snem hynrei ynda la kynriah sha Parking Lot, ngim ïoh satia ïa ka CoV. Lada kiwei kiba dang shu wan die jingdie hadien jong ngi, ki ïoh, balei ma ngi pat ngim ïoh,” la ong kawei na ki nongdie madan.
“Katba kim pat ai ïa ka CoV ngin ïakhih beit namar daei ngin siew ïa ka bai wai ing, ka bai skul, ka bai bam bai dih ban pynbiang manla ka sngi nalor ba ngim shym la ïoh die jingdie shuh mynta la shi bnai pura,” ka la ong.
“Kiba don dukan ki la ïoh jaka lut ha Parking Lot, MUDA katba ïa ngi wat tang ka jingsor jamin ruh kim pat leh,”ki la ong.
“Ngin shong shah thngan beit hangne, ngin wanrah lang ïa ki khun ki kti,” la bynrap kawei ka nongdie madan bad bynrap ba ka jingshah thngan kan bteng haduh ban da ïoh ïa ka CoV.
Haba kylli, ki la ïathuh ba ki don sa kumba hapoh 110 ngut ki nongdie madan ki bym pat ïoh ïa ka CoV. Ki la ïathuh ba watla ki la pynlong ïa ka jingïakhih, hynrei ki bor ba dei peit jong ka Municipal kim pat ai jubab satia.
