Shillong, Nailar, 11: Ki paidbah jong ka shnong Kaithakona, kaba don ha khappud jong ka South West Khasi Hills District ha ka Lah Sngi u Blei ki pyntip sha ki Pulit ka South West Khasi Hills District ha ka por 4:30 baje janmiet ba ki la ïohkem ïa uwei u mynder Bangladeshi ïa uba la ngeit ba u dei uba donkti lang ha ka kynhun Gang kaba la rung jubor ha ka shnong Rongdongia ban lute ha ka taiew baladep bad rahbor ïa u Balsrang A. Marak, uba la 21 snem ka rta da kaba thmu ban pynïap ïa u da kaba shu sliah ïa u ryndang.
Katkum u kyrwoh ba la phah da ka tnat Pulit jong ka South West Khasi Hills, la pyntip ba une u mynder Bangladeshi ba la shah kem ha ki paidbah u dei uba la tip kyrteng kum u Akram uba sah ha ka shnong Sherpur, Jenaghati, Bangladesh.
Tang shu ïoh jingtip, ki Pulit ki la leit shimti noh ïa u Akram bad la ïalam shwa ïa u sha Maheshkhola PHC ban jingsumar namarba u la don hapdeng ka jingmynsaw.
La antad ba ka jingmynsaw jong u Akram ka dei na ka jingshah thombor ha ki paidbah kiba la ïohkem ïa u namar katkum ka dur ba la phah sha ki lad pathai khubor la ïohi ïa u kynja sainar bad ki jain ba la teh ïa ki kti jong u ryngkat ka jingmih snam ka durkhmat.
Haduh mynta, ka jingshah kem jong ki dkhot ka kynhun Gang na ka Bangladeshi ka la kynjoh sha ka hynriew ngut da ka jingïohkem ïa u Akram.
Shwa kane, ha ka sngi Saitjaiñ saw ngut ki dkhot ka Kynhun Gang ki la shah kem ha ki paidbah kiba synran ïa ki Pulit bad ki shipai BSF ban thwet ïa ki runar bad ha ka sngi u Blei ki paidbah ka shnong Gilagora ki la ïohkem sa ïa u Mubarak Hussain, uba sah ha Kalagaon Sonamganj, Bangladesh.
