Shillong, Nailar, 12: U Superintendent of Police jong ka South West Khasi Hills District ha ka sngi Baar u la pynthikna ïa ka jingkhladnoh jong u Akram, uwei na ki mynder Bangladeshi uba la shah kem ha ki paidbah ha ka shnong Kaithakona, kaba dang hap hapoh hka South West Khasi Hills District.
Ha u kyrwoh, u SP u la pyntip ba ha ka 11 tarik Nailar, 2025 ha ka por kumba 4:30 baje janmiet ki nongtrei jong ka Nonghyllam Police Station ki la ïoh pdiang ïa ka jingpyntip na ki paidbah ka shnong Kaithakona, South West Khasi Hills District ba ki la lap ïa uwei u mynder Bangladeshi uba la mynsaw jur ha ka shnong jong ki, uba la pynithuh kyrteng ïalade kum u “Akram”.
U SP u la pyntip ba ki paidbah ki la aiti noh ïa u Akram sha ki shipai BSF jong ka 1st Battalion kaba don ha Kaithakona.
Hadien kata, ki shipai BSF bad ki Pulit ka Nonghyllam Police Station kiba la ïohi ba u Akram u la jur shaba palat ka jingmynsaw ki la pynkit noh sha Maheshkola PHC hynrei na ka jingbym don jong u Medical & Health Officer ha PHC, la pynkit noh sha Khonjoy PHC da ka kali Ambulance jong ka Maheshkola PHC hynrei tang shu poi ha PHC u Medical & Health Officer u la pynbna ba u Akram u la dkut mynsiem lypa.
U SP u la ïathuh shuh shuh ba ïa ka met ïap jong uAkram la pynkit noh da ki nongtrei ka Nonghyllam Police Station sha Civil Hospital, Mawkyrwat ban leh ïa ka jingtohkit da u Magistrate bad ban leh ïa ka Post Mortem Examination da ka jingsakhi lang jong u Magistrate katkum ki kyndon jong ka National Human Rights Commisison (NHRC).
Ha kaba ïadei bad kane, ki Pulit ki la ujor Suo moto ha Nonghyllam PS hapoh ka Section 103(1) BNS bad ka jingtohkit mynta ka dang ïaid shakhmat ban lap ïa ka jingshisha halor ka jingmynsaw bad ka jingïap jong u Akram.
