Shillong, Nailar, 12: Ka Meghalaya AIDS Control Society (MACS) ryngkat ka jingïatreilang bad ka National AIDS Control Organisation (NACO) ha ka sngi baar ki la sdang ïa ka jingïalap ban pynshai paidbah halor ka jingshyrkhei jong ka jingpang HIV/AIDS ha ka jylla Megha laya.
U Deputy Director jong ka NACO u Bah Ajoy M. Lanong ha ka jingïakren bad ki lad pathai khubor u la ïathuh ba kane ka jingpynshai paidbah ba la plie da ka Myntri ka tnat ka Koit ka Khiah ka Sorkar Jylla ka Dr. Ampareen Lyngdoh kan neh haduh ar bnai tam ha ka jylla Megha laya baroh kawei namar ka jingsngewkhia halor ka jingdon haduh 10 hajar tam ki nongshong shnong ha ka jylla kiba la ïabit ïa ka jingpang HIV/AIDS bad kiba la register bad ka NACO.
Ha kine ki jingpynshai paidbah, yn sa pynsngewthuh ba kito kiba shah ktah ha u khniang jingpang ba kin wan shakhmat ban leh ïa ki test khnang ba yn dup lah ban sumar bad ban pynkoit ïa ka jingpang.
Haba kylli, u Bah Lanong u la ong ba ka East bad ka West Jaiñtia Hills ki dei ki ar tylli ki distrik kiba kham bun ki briew kiba ïabit ïa ka jingpang HIV/AIDS.
Shwa kane, ki khynnah skul na ki skul bapher bapher bad ki samla pule na ki kolej bapher bapher ka nongbah Shillong ki la ïaid rally bad rah da ki plakad ban pynshai bad ban pynsngewthuh paidbah ïa ka jingma kaba ap na ka jingshong kha pathar.
