Shillong, Nailar, 14: Ka Iingbishar Meghalaya High Court ka la bthah ïa ki Special Officer ba la thung ha ka Public Interest Litigation (PIL) ba kin phah ïa ka kaiphod kaba bniah halor ka jingthung ïa ki tynrai dieng sawdong jong ka jaka ba la shna ïa ka projek Shillong Peak Ropeway Cable Car.
Ka PIL ba la mudui da ka Kong Geraldine G. Shabong ka la ujor halor ka jingkynnoh ba la leh khlemakor bad pom pathar ïa ki dieng ha ka thaiñ Lawsohtun jong ka East Khasi Hills District na ka bynta ka projek Shillong Peak Ropeway Cable Car.
Ka Sorkar Pdeng ka la aibor ban pynngat ïa ki dieng katkum ka ain kaba ïadei bad kane.
Ka Iingbishar ka la thung ïa u Advocate General bad ïa u Senior Advocate K. Paul kum ki Special Officer ban leit jngoh ïa katei ka jaka bad ban ai ïa ka kaiphod halor ka jingthung ïa ki tynrai dieng.
Ki Special Officers ki ladep ban leit jngoh ïa ka jaka bad ki lap ba ka don ka jingthung ïa ki tynrai dieng sawdong ka jaka.
La aipor ïa ki ba kin pynlong shuh shuh ïa ka jingjurip bad ban phah ïa ka kaiphod kaba bniah.
“Ka long kaba sngewtynnad ban ïohsngew na ki ba ka jingthung ïa ki tynrai dieng ha ka jaka ba don sawdong jong ka projek ka la ïaid shakhmat. Ki shem ba dang donkam ban leh ïa ka jingjurip bad ka jingtohkit kaba bniah bad ban ai ïa ka kaiphod kaba bniah ha kaba ïadei bad jingthung ïa ki tynrai dieng ha ki jaka ba marjan,” la ong ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Palei.
“Ngi pynsangeh noh ïa kane ka PIL haduh ka 2 tarik, Nailur, 2025. Ki Special Officer kin ai ïa ka kaiphod ha kane ka por,” la bynrap shuh shuh ka hukum.
