Shillong, Nailar, 16: Ka Iingmane jong ka Balang Presbyterian kaba don ha ka shnong Pamlahier, ka shnong kaba don ha ka thaiñ Mawryngkneng ka la shah wiang ding ha ka miet synnia sngi Palei mynta ka taiew bad la lap ïa kane ka jingjia ha ka step phyrngab sngi Thohdieng ha ka por kumba 2:00 baje.
Kane ka Iiingmane ka la julor malu mala. Kane kam dei shuh ka sien ba nyngkong ba ki runar kin leh dusmon ïa kane ka iingmane hynrei ka dei kaba la jia teng ruh ha ki por kiba mynshuwa.
Ki nongpynïaid ka Balang ki la ïathuh ba ha ka jingjia kaba mynshwa ki la ïoh bat ïa u runar uba leh ïa kane ka kam hynrei ha kane ka kynti kim don jingtip satia mano ba donkti ha kane ka kam runar.
Halor kane ka jingjia, ki Pulit ki dang pynlong ïa ka jingtohkit kaba bniah ban lap ksai ïa ki briew kiba donkti.
Kaba kham phylla ka long ba ki briew kiba leh ïa kane ka kam ki la buh dak da ki dak thoh ïa kaba ki nongïalam Balang ba kynthup ïa u Tymmen Basan Bah Klur Kharsati kim peiphang ka mut aiu kane ka dak.
