Shillong, Nailar, 18: Ka la mih ka jingïakynrup bad ka jingïashoh hapdeng ki paidbah ka jylla Meghalaya bad ka Jylla Assam tang hadien ba ki paidbah kiba shong basah ha ka shnong Maikhuli ki la pynkhyllem ïa ki post electric ba la thung beaiñ da ka Assam State Electricity Board (ASEB) ha ka shnong Maikhuli.
Katkum ka jingtip ba la ïohlum la ïathuh ba ki paidbah jong ka shnong Maikhuli ha ka 18 tarik, Nailar, 2025 ki la leit ban pynkhyllem ïa u post electric ba la thung da ka Assam ha ka por mynstep hajan ka pung bad hadien kata ki la leit phai noh sha la iing hynrei tang hadien katto katne por shi kynhun ki paidbah na ka jylla Assam ki la wad daw ïa ki katto katne ngut ki briew na Meghalaya halor ka jingpynkhyllem ïa ki nar post electric.
Hadien ba la mih ka jingïania bad ka jingïapatrong ki la don katto katne ki longkmie na Maikhuli kiba la jot ki jaiñphong.
Tang shu ïoh jingtip halor kane ka jingjia, ki bor synshar district na ka jylla Meghalaya bad na ka jylla Assam, ki la poi sha katei ka jaka ban tem ïa ka jingïakynad bad la beh noh ïa ki paidbah ba kin leit phai sha la ki jong ki ing ki sme.
Hadien kane, ki bor synshar district ka Meghalaya bad Assam ki la rai ban thaw noh da ka Peace Committee, khnang ban wanrah ïa ka suk ka saiñ hapdeng ki paidbah.
