Shillong, Nailar, 18: Kawei na ki jingjia kaba la pynher syrngiew bad pynsuhjer ïa ki longiing longsem bad ïa ka imlang ka sahlang, kawei ka khynnah ba la 15 snem ka rta katba ka dang ïaid lynti ban leit thoh eksamin sha skul ka la ngat ha ka apot sepsngi ha kaba ka la shah dung da u thyrnia injekshon ba la suba thep drok na ka kti ha ki ar ngut ki runar kiba la lah sop bad kah bha ïa la jong ka durkhmat.
Ha ka jingïakren bad u nonglum khubor ka Batesi Tv, katkum ka jingïathuh jong kane ka khynnah kaba la don mynta hapdeng ka jingshah sumar ha Dr. H. Gordon Robert Hospital, Jaïaw, Shillong, kane ka la jia ha ka Lah Sngi u Blei ha ka por kumba 1:45 baje noh sngi katba ka dang ïaid lynti ban leit sha skul ha kaba don ha Multipurpose ka Balang Presbyterian, Jaïaw ha Bible Society of India (BSI), Jaïaw Pdeng, Shillong.
“Ka jia ha ka por mynsngi 1:45 baje noh sngi katba dang ïaid lynti ban leit sha skul ha Multipurpose ka Balang Jaïaw. Nga ïaid nangto ki don ar ngut (ki briew ba shong ha ka Scooty) uba shong hakhmat u la tap da ka helmet bad ka mask. Ki dung ïa nga da u thyrnia injekshon bad nga sngew ba ka jingpang ka la par ha ka met bad ïa u thyrnia ki shim bad ki phet noh namarba ki la pynim lypa ïa ka Scooty,” la ong kane ka khynnah.
Haba kylli, ka la ong, “tang shu jia kumta nga la sngew tlot kum ban kyllon. Nga la shu mareh beit beit sha Dispensary Jaïaw Langsning hynrei namar bym don ki khlem ai dawai ïa nga.”
“Nga la wan sha Robert Hospital ynda ladep ujor ejahar bad pyntip ruh sha u Rangbah Shnong,” ka la ong bad bynrap ruh ba kam lah satia ban ithuh ïa ka durkhmat jong ki arngut ki runar.
Ka la ïathuh ba uba shong hadien u dei uba kieng ïa ka pla shakhmat bad ikop ruh ba ki bun bha ki thyrnia injekshon hapoh ka pla.
Ka kmie jong kane ka khynnah ka la ong ba ka jingpynpaw pyrthei ïa kane ka jingjia ka long namarba kam kwah ba ki khun ki kti jong kiwei kiwei ki longiing longsem ruh kin ngat ha kane kajuh ka apot bad ba ki dei ban kham husiar ban ban phikir bha ïa ka leit ka wan bad ka ïaid ka ieng jong ki khun ki kti khnang ban lait na kino kino ki jingjia ba sngewsih.
“Nga dei ka briew kaba shu bylla ban leit on skul ïa ki khun ruh ngam lah namarba nga hap leit trei hynrei nga kyrpad ïa ki bor Pulit ki bor shnong ba kin peit bha ïoh jia eiei ïa kiwei kiwei ruh,” ka la ong.
Ka la ïathuh ba ki Pulit bad ki nongïalam shnong ka Dorbar Shnong Jaïaw Pdeng ki la wan her mar mar sha Hospital tang shu ïoh jingtip halor kane ka jingjia.
