Shillong, Nailar, 18: Ki nongïalam jong ka Khasi Students Union (KSU) Laban Circle ryngkat ka jingïatreilang bad ka KSU Mawprem Circle hadien ba la ïoh pdiang ïa ka jingujor ha ka Lah Sngi u Blei ba ka don kawei ka bar jylla kaba ïaid kylleng ka shnong ban khrong pisa na ki paidbah ha lynti ha syngkien, mar mar ka seng ka la pyntip sha ki Pulit jong ka Laban Police Station bad ka Jhalupara Out Post.
Ha ka jingbuddien jong ki Pulit la lap ba kane ka bar jylla ka la sah ha kawei ka iing tap shiliang ha kawei ka jaka ba dang hap hapoh u pud u sam jong ka Cantonment Area.
U General Secretary jong ka KSU Laban Circle u samla Jason Laloo ha ka jingïakren bad u nonglum khubor ka Batesi TV u la ïathuh ba ynda la tohkit la lap ba kane ka longkmie bar jylla ka sah lang bad u kurim jong ka ryngkat bad ki arngut ki khun kynthei bad la shem ruh ba ki dei kiba wan na ka Jylla Uttar Pradesh.
“Ïa kane ka longkmie Muslim na lap nyngkong ha Last Stop, Laban katba ka dang khrong pisa bad ka khun kynthei ka jong ka na ki dukan. Ynda la tohkit la tip ba ka dang shu wan dang ar sngi sha Shillong bad kam don ïa ka EPIC ban pynshisha ïa ka jinglong trai shnong jong ka lait noh tang ka Aadhar Card ba la ïoh na Uttar Pradesh,” la ong u General Secretary ka KSU Laban Circle.
ïa kane ka briew la rah sha Jhalupara Outpost ryngkat ka jingsynran jong ki dkhot ka Seng bad ynda la ïalam sha ka iing sah jong kane ha Cantonment ha Jhalupara la lap ba u don lang sa u lok bad kawei khun kynthei kiba sah beaiñ ha ka jaka Cantonment da kaba shna da ka iing tap shiliang khlem ïoh jingbit.
Da ka jingsynran lang bad ki Pulit ka Jhalupara Outpost la beh noh ïa kine ki briew ban leit phai sha ka jaka ba ki wan.
“Ka seng ka sngewbynñiaw ba ki Anti-Infiltration Cell jong ka tnad Pulit ki long kiba synjor haduh katta katta ba kum kine ki briew ki ïoh rung da kaba suk bad sah beaiñ sha ka jylla bad ha kajuh ka por ynda telephone ïa ka Anti-Infiltration Cell kim ju lah ban poi namar bym ju don briew ne bor pahara,” la kynthoh ka seng.
Ka KSU ka dawa ba la donkam ban pynkhlaiñ ïa ki tnad jong ka Anti-Infiltration Cell bad ka Sorkar ka dei ban shimkhia halor ka ishu influx hynrei lym kumta ka seng kam banse ban shim ïa ka aiñ ha ka kti bad ïada ïa ka ri bad jaitbynriew na ka jingrung kyrthep ki bar jylla.
