Shillong, Nailar, 18: Ka Khasi Students Union (KSU) ka la rai ban pynjur shuh shuh ïa ka jingpyntreikam ïa la ka jong ka Inner Line Permit (ILP) ha ka jylla Meghalaya ban khanglad ïa ka jingwan tuid kyrthep ki mynder ri sha ka jylla.
Ka Union ka la kam ba kam banse shuh ban shim ïa ka aiñ ha la ki kti namar ba ka Sorkar Pdeng bad ka Sorkar Jylla ki la pynslem ban ai jingmynjur ban pyntreikam ïa ka ILP ha ka jylla.
Ka KSU ka la dawa ruh na ka Sorkar Pdeng ban ai ïa ka jylla Meghalaya ïa ka kynhun shipai Territorial Army, kaba ïasyriem bad kaba la ai ïa ka jylla Mizoram ban ïada ïa u pud u sam bad ïa ki jingmyntoi jong ka jylla.
Haba kren sha ki lad pathai khubor ha ka jingïakhih shong kyllaiñ myngngor ba la pynlong da ka North East Students Organisation (NESO) ha Shillong ha ka Lah Sngi u Blei, u General Secretary ka KSU u samla Donald V Thabah u la ong, “ngi la pynlong ïa ki jingïakhih ban dawa pyntreikam ïa ka ILP. Hynrei ka Sorkar Pdeng ka leh kuman ban pyntreikam ïa ka ILP. Ka Sorkar Jylla kam da kitkhia eh ban buddien ïa kane ka jingdawa na ka Sorkar Pdeng. Namarkata, ka KSU kam banse ban pyntreikam la ka jong ka ILP ha ka jylla ha kaba ki dkhot kin pynlong ïa ki jingtalasi bad ka jingkhynra ïa ki mynder ri bad ïa kiwei pat ki briew kiba i artatien kiba wan rung shapoh ka jylla.”
Haba kylli, u samla Thabah u la ong, ‘ngi hap ban shim ïa ka aiñ ha la ki kti. Ngim banse ban leh kumta namarba kim don da kiwei pat ki aiñ ban ïada ïa ka hok jong ngi ki trai ri trai muluk. Namarkata, ngi sngewsih ban ong ba ngi hap ban shim ïa ka aiñ ha la ki jong ki kti.”
Ha kaba ïadei bad ka jinglong jingman ha ri Bangladesh bad kumjuh ruh ïa ki jingshah beh shnong ki poi wir da ka sorkar Assam, u nongïalam ka KSU u la ong, “ngi sngewkhia shibun eh ba ka jingwantuid jong ki briew kiba la shah beh shnong na ka jylla Assam bad ki briew kiba mad ïa ka jingshah pynshitom beiñ ha Bangladesh ki lah ban rung shapoh ka jylla jong ngi.”
U la pyntip hadien ka jingïakhih ba la pynlong da ka NESO, ka KSU kan dang pynjur shuh shuh ïa ka jingkhynra ïa ki mynder kiba wan rung sha ka jylla Meghalaya.
Halor kawei pat ka jingkylli, u samla Thabah u la ong, “ngim tip balei ka Sorkar ka pynslem ban pyntreikam ïa ka ILP hynrei ngi dawa na ka Sorkar Jylla ba kan buddien tyngeh na ka bynta ban pyntreikam ïa ka ILP. Katba ka Sorkar kam pat lah ban pyntreikam ïa ka ILP ne kino kino kiwei pat ki lad ki lynti ban ïada ïa ka jaitbynriew, ka KSU kam banse ban shim ïa ka aiñ ha la ki kti.”
Ka KSU ka la rai ruh ban pynjur ïa ka jingkhynra ban pyrkhing ïa ka jingrung tuh ki mynder ri na khappud ka jylla Meghalaya khamtam hadien ka jingthombor jong ki runar mynder ri ha ka shnong Rangdongai, South West Khasi Hills dang shen.
