Shillong, Nailar, 18: Ki nongïalam jong ka North East Students Organisation (NESO) ba la lamkhmat da u Chairman u Bah Samuel B Jyrwa ryngkat bad ki nongïalam ka Khasi Students Union (KSU) ba la lamkhmat da u President u samla Lambokstarwell Marngar kynthup ruh ki dkhot ki la shong kyllaiñ myngngor ha Khyndai Lad, Shillong ban dawa ïa ka Sorkar Meghalaya bad ïa ka Sorkar Pdeng ba dei ban kyndang bad ban pynher krad ïa baroh ki mynder ri na ka jylla Meghalaya bad na ka thaiñ Shatei Lammihngi.
La sakhi ba ki dkhot ka KSU ki la bat ruh ïa ki plakad ba don ïa ki jingthoh ba la dawa ïa ka sorkar ban thwet ban pyndam bad ban beh krad ïa ki mynder ri na ka jylla Meghalaya.
Ha kane ka jingïashong kyllaiñ myngngor la synran lang da u President ka FKJGP u Bah Dundee C. Khongsit bad u President ka HNYF u Bah Sadon Blah bad kiwei kiwei.
U Chairman jong ka NESO u Bah Samuel Jyrwa ha ka jingïakren bad ki lad pathai khubor u la ong ba jingdawa ïa ka Inner Line Permit (ILP) ka dei ka mat kaba la slem bha ïa kaba la dawa da ka Khasi Students Union (KSU) naduh u snem 1983.
U Bah Jyrwa u la ong ba ka Sorkar India haduh mynta kam shym la pyntreikam ïa ka Inner Line Permit (ILP) ym tang ha ki jylla jong ka thaiñ Shatei Lammihngi hynrei wat hapoh ka jylla Meghalaya ruh kumjuh.
Haba kylli, u Bah Jyrwa, u la pynkynmaw ïa ka jingkren jong u Myntri Rangbahduh ka ri u Narendra Modi ha ka jingrakhe ïa ka sngi laitluid jong ka ri India kaba la long ha ka 15 tarik mynta u bnai khamtam eh halor ka jingshah ktah jong ki jylla ka thaiñ Shatei Lammihngi na ka jingjur shaba palat ka jingwan rung kyrthep jong ki mynder ri na ka ri Bangladesh.
U President ka KSU u samla Lambokstarwell Marngar haba bynrap, u la maham tyngeh ïa ki Dalal kiba ju mlien ban pynrung tuh ïa ki mynder ri na ka ri Bangladesh sha ka jylla Meghalaya lada ka seng ka lap, ki hap ban sngewthuh kham bha kaei ka ban sa jia ïa ki.
U President ka KSU u la ong ruh ba ka seng kan ym shongthait ban kyndang bad ban kthong ïa ki mynder ri ha ka Bri u Hynniewtrep kan ym sangeh lano lano ruh.
U la ong shuh shuh ba ka jingdon jong ki shipai BSF ha khappud kim pat lah satia ban ïada pura ïa ka jingwanrung tuh jong ki mynder ri sha u pud u sam jong ka jylla hynrei u la banjur ba dei sa tang ka Aiñ kaba lah ban khanglad ïa ka jingrung beaiñ jong ki mynder sha ka jylla Meghalaya.
