Shillong, Nailar 20: Ka sorkar jylla ka la pynbna ïa ki jingpyrkhat ban wanrah lang kawei ka rukom treikam halor ka jingpynkynriah ïa kiba die madan bad kiba die madan harud surok ha kylleng ki jaka jong ka jylla kumba la leh ha Khyndailad.
U Symbud Myntri Rangbah ka jylla uba khmih ïa ka tnat ki Kam Pynroi Sor u Bah Sniawbhalang Dhar haba kren sha ki lad pathai khubor ha ka sngi Balang u la ong ba ka rukom leh kumba la pyndonkam ha Khyndailad yn pyndonkam ruh sha kiwei ki thaiñ, khnang ba kan long kawei haba ïadei bad kane ka kam pynkynriah ïa ki.
“Ngin trei katkum ka rukom badei bad kajuh ka rukom leh yn pyndonkam sha baroh kiwei ki jaka bad aiba ka por kan wan hynrei ngin sa lah ban leh bha ïa ka,” u la ong.
Ha Khyndailad, ka sorkar ka la sdang ban pynkynriah ïa kiba die madan khnang ban pynlong ïa kane jaka kaba dei tang ban ïaidkjat bad ban kyntiew ïa ka kam jngohkai ha ka nongbah.
Ïa ki nongdie madan la aiti da ka shifting allowance kaba long T. 10,000 bad sa ka pisa ba bynrap kaba long T. 2,000 ha ka shibnai haduh 5 bnai.
U Bah Dhar u la ïathuh ba ka tnat ka dang trei da ka kyrdan kyrdan khnang ban lah pynbeit ïa kiba die madan ba khlem aibor ha ki jaka kum ha Laitumkhrah bad sha kiwei ki jaka.
Ïa ka Shillong Municipal Board la bthah da ka Meghalaya High Court ban aiti ïa ka kaiphod halor ka jingdon kiba die madan kiba la don license bad kiba die madan ki bym don license ha ka thaiñ Laitumkhrah.
Haba kylli, u Bah Dhar u la ïathuh ba ka sorkar ka angnud ban pyndep noh ïa kane kam katkum ka aiñ bad kito kiba die madan kiba don ha Khyndailad kin ïoh ïa ki Certificate of Vending (CoV).
Katkum ka jingïathuh jong u, kiba die madan kiba la dep shah pynkynriah ki la pynpaw ka jingsngewhun ïa kane ka jingpyrshang ka sorkar, ha kaba ki la kyrpad ruh ïa kiwei pat ki lad kum ka bording, ka um bad ki paiñkhana.
“Ngi la pynthikna ba ïa ki jingsngewkhia jong ki yn sa pynbeit bad ki la don ruh ki jingpyrshang ban pynrung ruh ïa baroh kiba die madan kiba dangsah,” u la bynrap.
U Bah Dhar u la ïathuh ruh ba ka sorkar ka dang bteng ban wad bad jurip khambun ki jaka ha ki jaka bapher bapher khnang ban lah ban ai jaka ïa kiba die madan.
