Shillong, Nailar 20: Ka sorkar jylla ka la rai ban ïakren bad ka sorkar pdeng na ka bynta ban thaw ïa ka Territorial Army khnang ban pynkhlaiñ ka lad jingïada bad ka jingshngaiñ ha ki khappud kiba don ha ka jylla.
Haba pynbna ïa kane ka sngi Balang, u Myntri ka sorkar jylla bad u nongaiktien ka sorkar MDA u Bah Paul Lyngdoh u la ong, “Ngin ïakren ïa kane kam bad naba kane kadei ruh kaba la sngewkhia da ka sorkar pdeng, baroh ki jingtip ba bniah haba ïadei bad ka territorial army yn sa sam bad ki dkhot ka kynhun Myntri.”
“Ngin sa ïakynduh ha ka 26 tarik mynta u bnai bad ngin sa don ha ka jaka ban pynïaid ïa kane ka kam shakhmat ha ka jingïalang ka kynhun myntri ka sorkar,” ula bynrap.
U Bah Lyngdoh u la ïathuh ruh ba kane ka kam shaphang ka jingdonkam na ka bynta ka Meghalaya ban don la ka jong ka Territorial Army la pynpaw da ki nongïalam ka North East Students Organization (NESO) bad kumjuh ruh na ka liang ka Khasi Students Union (KSU).
“Ha ka jingshisha ïa kane ka jingai jingmut nga la ai mynshwa ha ka por ba nga dang long u president jong ka KSU bad mynta ngi la ïohpdiang ka dak ha kaba kumno ngin pynïaid shakhmat bad ka jingsdang ïa ka kam ban don ïa ka territorial army,” u la ong.
U Bah Lyngdoh u la ai ruh ki nuksa ïa ki jylla kum ka Mizoram bad Assam, kiba dei ki jylla kiba la dep thaw ïa la ki jong ki Territorial Army.
Lah ban pynkynmaw ba dangshen ka NESO bad ka KSU ha ka jingïakhih shong kyllaiñ myngor bajai jai ki la dawa ïa ka sorkar jylla ban khang khyrdep noh ïa ka khappud hapdeng ka India bad Bangladesh bad ban pyntreikam pyrkhing bha ïa ki kyndon khnang ban lap bad ban phah leit phai noh ïa ki mynder ri kiba wan rung beaiñ na ri Bangladesh.
