Shillong, Nailar, 20 : San ngut ki nongïalam jong ka Hynñiewtrep National Youth Movement (HNYM) ki la shah kem ha ki Pulit ka Ribhoi District hadien ka jingujor ejahar da ki nongñiah kali Tourist da kaba la kynnoh ba kine ki san ngut ki dei kiba donkti ban dawa pisa ha ka kyrteng ban khynra mynder ri bad bar jylla.
Ïa ka ejahar la ujor da ka East Jaintia Hills Tourist Drivers Association (EJHTDA) bad ka Ïatyllilang Drivers and Tourist Taxi Association (IDTTA) ha Nongpoh Police Station namar ka jingshah pyndik ki nongñiah kali kamai Tourist.
Dei ha ka 16 tarik mynta u bnai ki nongñiah kali Tourist kiba la shah pynsangeh ha Nongpoh, Umdihar bad ha Umsning ki la kynnoh ba ka kynhun ba la lamkhmat da u Sparly Syngkli ki la shah dawa pisa T. 3000 bad T. 6500 wat hadien ba ki bar jylla kiba shong ha ka kali Tourist ki dei kiba biang ki kot ki sla bad ba la pyllait da ki Pulit ka Anti-Infiltration Check Gate na Byrnihat.
Tang shu ïoh pdaing ïa ka jingujor ki Pulit ki la pynlong ka jingtohkit bad ïoh kem ïa ki ngut ki nongïalam bad ki dkhot ka ka HNYM ba kynthup ïa u Sparly Syngkli na ka shnong Nongkhrah uba dei u Chairman ka Anti Influx Cell, u Donboklang Kharbani na ka shnong Mawroh uba dei u President ka Nongpoh Circle, u Aiborlang Marbaniang na Umjarasi Working President ka Nongpoh Circle bad 2 ngut ki dkhot ba kynthup ïa u Krius Pariong na Pahamrïoh bad u Ricky Tangsang na Sajer Nongpoh.
Ki Pulit ki la register case pyrshah ïa kine ki ar ngut bad la rah tian bishar ïa ki ha ka sngi Balnag kashari Nongpoh bad ka jingtohkit ka dang ïaid shakhmat.
Ki Pulit ha u kyrwoh ba la phah sha ki lad pathai khubor ki la ïathuh ba ha ka jingtohkit ki la lap ïa ka jingsiew pisa jong ki nongñiah kali kamai Tourist sha ki Account shimet jong ki nongïalam ka HNYF ba la shah kem ryngkat ki dur bad ki video ba la ïoh ring ban pynthikna ïa ka jingkynnoh ba ki dawa pisa na ki nongñiah kali tourist.
Ki Pulit ki la pyntip ruh ba u Ricky Tangsang lem bad ka kynhun jong u ki dei kiba ju donkti ha kiba bun ki kam dawa pisa bad u dei ruh uba la shah pynngat case ha Nongpoh PS, Umïam PS bad ha Laban PS.
