Shillong, Nailar, 21: Khnang ban khanglad ïa ka jingwanrung jong ki mynder ri, ka Deputy Commisioner jong ka East Khasi Hills District ka Kong Rosetta Mary Kurbah ka la pynjari da ka korphiw miet ha shilynter ka khappud bad ka ri Bangladesh na ka bynta ar bnai kynthih.
Kane ka korphiw miet kan treikam naduh ka por 8 baje mynmiet haduh ka por 6 baje mynstep hapoh ka jingjngai kaba 1 kilomitar na u Zero Lline jong ka khappud.
Kane ka hukum ba la pynjari da ka District Magistrate ha ka sngi Palei ka long ban khanglad ïa ka rung ka mih jong ki briew ha khappud kiba don jingthmu ban jam beaiñ sha Bangladesh ne ban rung tuh sha India, ban khanglad ïa ka jingïaid proseshon beaiñ ne ka jingïalum briew khlem da ïoh jingbit palat 5 ngut shaneng bad ban rah ïa ki tiar siat bad kiwei kiwei ki tiar kiba lah ban pyndonkam kum ki tiar pynmynsaw ba kynthup ïa ki dieng/ki nar bad ki maw ha ki bynta jong ka khappud Indo-Bangladesh. Ka hukum kan treikam ruh ban khanglad ïa ka jingkhaïi beaiñ ïa ki masi, ki mar khaïi beaiñ, u kwai, u tympew, ki dohkha tyrkhong, u biri, sikret bad kiwei kiwei.
Kane ka hukum ka long kaba donkam haba peit ïa ka jinglong jingman ha Bangladesh mynta ha kaba ka don ka jingma kaba lah ban mih na ka jingrung tuh jong ki runar ha khappud, ki dkhot jong ki kynhun seng lehnoh ba la khein beaiñ, ki nongkhaïi tuh bad kino kino ki kam beaiñ ha khappud Indo-Bangladesh, la ong ka Kong Kurbah.
Namarba ki don katto katne ki bynta jong ki jaka khappud ha East Khasi Hills ki dei kiba dang lait rynghang bad kiba lah ban wan rung tuh da ki mynder ri, ki dkhot jong ki kynhun runar kiba don jingïadei bad ki kynhun pyrshah ri kynthup ïa ki kynhun seng lehnoh kiba don ïa ki tiar ïaleh kiba lah ban ïalum hajan u pud u sam ha ki por miet ban bteng ïa ki kam runar jong ki bad lada ym lah ban khanglad kan lam sha u pud bym lah satia ban khanglad ïa ka jingrung tuh ka ban poi shaduh u pud ban wanrah ïa ka jingpynthut ïa ka shongsuk shongsaiñ ha ka District, ka la bynrap.
