Shillong, Nailar, 21: Ki paidbah kiba shong basah ha ki shnong khappud jong ka South West Khasi Hills District bad ka ri Bangladesh ki la kyrpad ïa ka Sorkar Jylla ban buh noh da ki Anti-Dacoity Camp khnang ban khanglad bad ban ïada ïa ki paidbah ha ki shnong khappud na ka jingwan rung jubor jong ki mynder Bangladeshi kiba ju leh ïa ki kam pyntriem pyrshah ïa ki paidbah kiba shong basah ha ki shnong khappud.
Ki paidbah ki la pynpaw ïa kane ka jingdawa ha ka 20 tarik, Nailar hakhmat ka kynhun ba la phah kyrpang da ka Sorkar Jylla ïa kaba la lamkhmat da u MLA jong ka Mendipathar Constituency u Marthon J. Sangma hadien ba u Myntri Rangbah ka Jylla u Conrad K. Sangma u la ioh pdiang ïa ka jingujor halor ki kam pyntriem jong ki mynder Bangladeshi na ki paidbah ka shnong Khonjoy, Rongdangai bad Maheshkhola.
U Bah Himalaya Shangpliang uba long ruh u Adviser jong ka tnat Pule Puthi ka Sorkar jylla uba la shah kynthup lang ha kane ka kynhun ba la phah da ka Sorkar Jylla, ha ka jingïakren bad ki lad pathai khubor u la ïathuh ba ki nongïalam shnong ki la aiti da ka dorkhas sha u Myntri Rangbah lyngba kane ka kynhun ban pynsngew ïa ki jingdawa jong ki paidbah kiba shong basah ha khappud.
