Shillong, Nailar 23: Ki rynsan shong dukan jong ki nongdie madan kiba don harud surok ka thaiñ Motphran ki la shah kyndang lut ha ka jingpynkhuid jong ka Dorbar Shnong Wahthapbru ïa ki sawdong sawkun jong ka thaiñ Motphran bad ïa ki bynta kiba hap hapoh ka jingkhmih jong ka shnong Wahthapbru.
Ïa kane ka jingpynkhuid la ïa treilang da ka Dorbar Shnong, ka Seng Kynthei bad ka Shillong Municipal Board (SMB) kynthup ruh ki nongdie madan ha kaba ka jingpynkhuid ka la sdang naduh Jeep Stand terter shaduh ka bynta ba don ka HDFC Bank kaba dang hap hapoh ka jingkhmih jong ka shnong Wahthapbru.
Ha kane ka jingpynkhuid la kyndang lut ïa ki rynsan shong dukan bad ki dukan tap shiliang bad ha kine ki jaka la lap ba sha khrum ki dap da ki jaboh jabaiñ ha kaba la hap ban khat bad pynkit lut ïa ki lyngtang ki dieng pyut da ki kali jong ka Municipal.
Ka Kong Suk Pariat ha ka jingïakren bad u nonglum khubor ka la ong ba kane ka jingynkhuid ïa ki bynta jong ka thaiñ Motphran ka long kaba donkam watla ka Shillong Municipal Board ka la buh ïa ki briew ban pynkhuid namarba ha kane ka jaka ka iew ka sdang naduh ka por mynstep bad ka kut ynda la kylla step ha kaba ïa ki jaboh la shu bret sha madan madiah kat haduh ba ka la wanrah ïa ka jingjaboh kaba isaitmet.
