Bah Philip Marweiñ
Ka Kompeni sorkar Meghalaya Electric Corporation Limited (MeECL) mynta ka dang bah ïa kane ka ram barim haduh T. 565 klur bad ka khmih lynti ban siewdep ïa kane ka bai ding (power tariff) sha ka National Power Corporation Limited (NTPC Ltd) bad ka khmih lynti ba kan pynkhuid ïa kane ha u Lber 2026 da ka jingkyrshan lem ka sorkar jylla, la ong u Chairman jong kane ka Kompeni, u Mr. Sanjay Goyal.
Katkum ka jingïathuh jong u Mr. Goyal jong kane ka Kompeni ka ram ka dang ban khia na ka bynta ka projek Ilektrik ha wah Ganol ha Garo Hills bad kumjuh ruh na ka bynta ka projek thymmai ha Wah Umtrew. Tang na ka bynta kine ar tylli ki projek ruh ka ram ka dang khia haduh T. 375 klur (T.150 klur na Ganol bad T. 225 klur na ka new Umtru).
Ka ram ba ka MeECL ka dang dei ban ïoh na ki paidbah nongthang ding Ilektrik ki bymsiew tista bad ki ba shu thang tuh khlem siew shuh ka la kot T. 282 klur. Haba la kylli la ki karkhana heh bad ki dukan heh kiba thang shibun Megawatts bad Kilowatts ki siew tista ne ki siew slem, u la jubab ba ki hab siew biang por namar ki duhnong shibun ba bankhia ka jingkit ban sa ka kuna kaba khia bha ka baithang ding Ilektrik. Ka bai thang ding jong ki iing ki sem ki bym pat siew ka dang sah sa kumba T. 150 klur bad ka bai thang ding jong kito ki iing kiba ïakhun mokutduma ka dang sah kumba T. 85 klur, bun na ki ki shu jah klep, ym rat da lap sabut shuh, u la ong namar ki dei kiba la slem bah.
Haba la kylli na u katno shi shi bnai ka jingsiew tulop ïa ki nongtrei, u la jubab T. 40 klur shi bnai kynthup ïa ka Penshon bad kiwei kiwei ki jnit ki jnat ki jinglut. Haba ïathuh ïa ka jingïoh Bai thang ding Ilektrik shi shi bnai u la ong malu mala hapdeng T.90 haduh T.100 klur. Nangta, u la kem ktien ba lada ym kit ïa ki ram ki shah ba la shim naduh mynshuwa bad lada ïoh lum thikna bad tista ïa ka bai thang ding Ilektrik ka Kompeni MeECL kam rat da khuslai eh. U la batai ba ka Kompeni kan nang hab thied shi shi thied ding Ilektrik na kiwei ki Kompeni nongpynmih ding namar katba nang ïaid ka por ka jingdonkam ding Ilektrik ka nang bun nang bun hynrei ka jingpynmih ding na lade kam dap, lait tang khyndiat ha ki aiom ba jur slap. Kumta ban kham duna ka jingthied ding hab ban tei ïa ki Projek pynmih ding Ilektrik lajong hamtam ban sdang noh ïa ka Leshka Hydro Electric Project Stage-II ka ban pynmih 250 Megawatts. “Hooid, na ka bynta kane ruh hab ban shim da ka ram hynrei lah ban siewdep suki suki namar kane ka kha tyngka kloi”, u la ong. Sa kawei pat, u la ong ba dang don sa kiwei kiwei ki Hydro Electric Project ba lah ban aiti ha ki Kompeni heh seng ban pynmih ding bad lada ki kloi ban leh ïa kata ka jingmyntoi kan long jong ka jylla namar kan ïoh ei ka ding Ilektrik kumba 12 % ei ei.
Haba la kylli ki Hydro Project barim ki la nang tymmen bad ki lah ban donkam ban pythymmai bad maramot ban pynkhlaiñ biang bad la donkam ban pynlut peisa biang ne em, u Goyal u la jubab ba ka Umtrew ( Umtru) Stage-III ka la donkam ban pynbha bad maramot janai (overhauling) bad la donkam kumba T. 300 klur ei ei ban shimram na ka JICA Japan. Ki bun kiwei kiwei ki jingdonkam ban nang pynbha ïa ka kompeni hynrei hab ban tare katba lah bad katba kot ka bor.
U Mr. Sanjay Goyal u la ïathuh ba ïa mynta ka Kompeni shaid shaid ka dang pyntreikam ïa ka Revamp Distribution Sector Scheme (RDSS) bad dang lah ban pyntreikam kumba 30 % da ka jingbei peisa jong ka sorkar India (Ministry of Power).
