Shillong, Nailar, 25: Ha ka sienjam kaba kongsan ban ai jingkyrshan pisa ïa ki Autonomous District Council (ADC) ha Meghalaya, u Myntri Rangbah ka Jylla u Conrad K Sangma ha ka Lah Sngi u Blei u la pynbna ïa ka rai jong ka Sorkar Jylla ban siew ïa ka tulop jong ki nongtrei ha ki lai tylli ki Council naduh ka 1 tarik, Naiwieng, 2025.
Ha kaba ïadei bad kane, la thaw ïa ka komiti ban lum ïa ki jingpyntreikam kiba bniah, da kaba ïatreilang bad ki District Council hapoh 45 sngi.
Kane ka rai ka la wan hadien ka jingïathir sani kaba bniah bad ka Garo Hills Autonomous District Council (GHADC).
U Sangma u la ong ba ka GHADC ka la mad ïa ka jinghiran pisa kaba jur bha wat hapdeng ka jingmih khajna bad ka jingpynlut ha kaba ka jingdonkam ban siew tulop ha ka shisnem ka kot haduh 70 klur tyngka tam eiei katba ka jingmih khajna kam kot wat tang ïa ka 30 klur tyngka.
Kum kine ki jingeh ki la paw ruh ha ka Jaiñtia Hills Autonomous District Council (JHADC) bad katto katne ha ka Khasi Hills Autonomous District Council (KHADC).
Da kaba pynpaw ba ki ADC ki dei ki shlem treikam kiba kongsan bad ki dei ka dak jong ka kolshor bad ki riti dustur jong ka jylla, u Sangma u la ong, “kumta, ka long kaba donkam eh ïa ka Sorkar Jylla ban pynthikna ban shimkhia ba ym tang ba ki Council kin treikam bha hynrei kin kiew bad ban pynthikna ba ki bynta bapher bapher jong ka riti dustur jong ngi bad ka kolshor jong ngi bad ki bynta bapher bapher jong ka jingbat ïa ka jaka.”
“Da kaba buh ha ka jingmut ïa kane ka bynta, ngi kum ka Sorkar ngi la rai ba ha ka 1 tarik, Naiwieng, 2025 ka Sorkar Meghalaya kan sa siew ïa ka tulop jong ki Autonomous District Council bapher bapher,” u la pynbna.
Da kaba ñiew ba ka dei ka kam radbah bakongsan, u Myntri Rangbah u la ong, “shisien ba la siew ïa ka tulop, ki District Council bapher bapher ki lah nangta ban pynleit jingmut ha ki bynta bapher bapher bad ki bynta jong ka roi ka par bad ki bynta bapher bapher jong ka riti dustur bad ka kolshor.”
U Sangma u la pynbna ruh ba ïa ka rukom treikam ban pynthikna ba ïa ka rai jong ka Sorkar yn pyntreikam ha ka rukom kaba dei yn sa leh da ka komiti ka ban ïatreilang bad baroh ki District Council kata, ka KHADC, JHADC bad GHADC.
“Kane ka komiti kan shim por 45 sngi ban pynthikna ba kin ïatreilang bad baroh ki Council bad ban pynthikna ba kine ki rukom kin don ha ka jaka jong ki khnang ba ïa ka tulop yn lah ban siew sha ki District Council da ka Sorkar Jylla,” u la ong haba pynthikna ba kan ym don kano kano ka jingtuklar ïa ka jingtreikam kaba manla ka sngi ne ka bor synshar jong ki District Council.
“Ka jingthmu jong ngi ka long tang ban wanrah ïa ka jingskhem ha ka liang ka pisa ka tyngka, ka rukom treikam kaba biang khnang ba ki Council kin dup lah ban siew tulop ha ka por bad khnang ba kin lah ban bteng ban treikam bad trei katkum ba la kdew ha ka riti synshar,” la pynskhem u Sangma.
U Myntri Rangbah u la ïakynduh ruh ïa u Lat ka jylla Meghalaya u CH Vijayashankar ban pynsngew ha u ïa kane ka rai jong ka Sorkar.
“…..katkum ka jingbthah bad jingpynïaid jong u (Lat), ïa kine ki rai yn sa shim ha ka Kynhun Myntri lashai ka sngi, ngin sa shim ïa kine ki rai da kaba thikna ban pynthikna ba manla ka bynta jong kaei kaba la ïakren bad u Lat yn pyntreikam pura,” u la ong shuh shuh.
