Shillong, Nailar, 25: U MP ka seng Congress na Tura u Saleng A. Sangma u la ïaroh ïa ki nongtrei jong ka Garo Hills Autonomous District Council (GHADC) kiba la bteng ban pynim ïa ka Sixth Schedule lyngba ka jinglen lade bad ki jingshah shitom da kaba bteng ban shakri ïa ka kam wat hapdeng ka jingbym ïoh tulop la 43 bnai kynthih.
“Nga kwah ban ai jingïaroh ïa ki nongtrei kiba trei shitom bha ban pynim ïa kane ka shlem treikam. Dei namar jong ki ba ka Sixth Schedule jong ngi ka dang im.”
“Lym kumta, lada kine ki nongtrei ki mih noh, kaei ka ban jia ïa ka District Council kaba la ai sngewbha bad pynkha ha ka por jong ka Indira Gandhi,” ong u Sangma haba ïakren bad ki nongthoh khubor ha ka Lah Sngi u Blei.
U Sangma, u la pynpaw ïa ka jingsngewkhia na ka bynta ki longiing jong ki nongtrei kiba shem jingeh namar ka jingbym ïoh ïa ka tulop kaba la slem bha.
“Kum u MP nga lah ban shu thoh shithi, ngam lah ban leh eiei satia namar ki kti jong nga ki shah teh hynrei ka jingkyrshan ba kynja mynsiem jong nga bad ki jingduwai jong nga ki don beit bad ki,” u la ong.
“Nga la dep ban ïakren ïa ki katto katne ngut ki Myntri ha kaba ïadei bad kane ka bynta, nga la ïakren ruh bad u Myntri ka Tribal Affairs ha kaba ïadei bad ka jinglong jingman mynta ha rilum Garo bad ka GHADC”, la ong u MP bad maham ba ka long kaba ma bha lada ka GHADC kam lah ban siew ïa ka tulop sha ki nongtrei kiba la duh tulop la 43 bnai kynthih.
