Shillong, Nailar 25: Ki nonglute kiba la kah ïa ka durkhmat ha ka step sngi u Blei ha ka por kumba 2:00 baje eiei ki la leit lute na ka ophis treikam bad na ka iing jong u nongkhaii maw-it uba dei ruh u hehspah ha ka thaiñ 13 mer, Jorabad. Kane ka kynhun nonglute ka la rong ruh ïa ki jingdeng ksiar bad ka pisa kaba kot da ki lak.
U nongkhaii ba la shah lute u dei uba la tip kyrteng kum u Deepak Hazarika.
Katkum ka jingïathuh jong u Manager bad ki nongap pahara, ki runar kiba la sop bha ka durkhmat nyngkong ki la rung ha ophis treikam da kaba teh ïa u Manager bad ïa ki nongap pahara bad shoh dusmon ruh ïa ki bad khynra naphang ïa ki jingdon jingem hapoh ka ophis.
Hadien ba ki ladep khynra ïa ka ophis ki nonglute ki la rung pat sa ha ka iing sah kaba don sha lyndet jong ka ophis bad kyndang naphang ïa ki almari bad ki jaka buh tiar ban rong ïa ki jingdeng ksiar bad ka pisa kaba la kot da ki lak tyngka bad phet krad hadien kata.
Tang shu ïoh jingtip ki Pulit ka Jorabat bad Sonapur ki la leit bran bran ban pynlong ka jingtohkit bad ban resgister case pyrshah ïa ki nonglute kiba donkti.
Kat haduh mynta ki Pulit ki dang pynlong ïa ka jingtohkit ban thwet ïa ki nonglutte kiba donkti.
