Shillong, Nailar 26: Ka sorkar jylla ka la rai ban pynlong ïa ki eksam bad ki interview ban pynskhem ïa ka jingthungkam adhoc kaba la thung hadien jong ka 31 tarik u Nohprah, 2007.
Hadien ba la pynïaid ïa ka jingïalang ka kynhun Myntri ha ka sngi baar, u Myntri Rangbah u Conrad K Sangma u la pynbna ba ka sorkar kan pyndap malu mala kumba 1500 tylli ki kam kiba lait lyngba ka kam ban shu jied.
Ha ki por ba la leit, ka sorkar ka la pynskhem ïa ki kam adhoc ba la thung ha shwa ka 31 tarik u Nohprah, 2007, kaba la ktah ïa kumba 3000 ngut ki briew, kaba long katkum ka jingbthah jong ka Supreme Court.
“Mynta hadien ka snem 2007, ki dang don ki jingthungkam adhoc bad kumta ka jingkylli ka mih ba kaei ka sorkar kan leh na ka bynta kito. Mynta ka Supreme Court ka khlem ai laitluid ïa ngi ban ïaid shakhmat bad tang ban shu pynskhem ïa kito ki briew kiba trei ha kito ki kam. Namar kata ka sorkar ka hap ban ïaid da ka kam jingïajied (selection process) bad lada phim pynskhem ïa kine ki kam, kine ki kam kin pyni barabor ba ki sah thylli watla ka don ka jingthungkam adhoc pyrshah ïa ka, naba ka kam ban pynskhem ban jied khlem shym la leh. Kumta ngi la shim ka rai ba baroh ki kam kiba thylli ngin pyndap noh,” ïathuh u Sangma sha ki lad pathai khubor.
U Myntri Rangbah u la pynbna ba ka sorkar ban ai ka lad ban pynjlan ïa ka rta kaba shisien na ka bynta ki nongtrei adhoc kiba la trei la kumba 10-15 snem, kaba shah ïa ki ban ïakhun ïa ki eksam.
“Ka kynhun Myntri ka la pynskhem ïa ka SOP na ka bynta ki kam ban jied, ba kynthup ïa ki kyndon ban mab noh ïa ka rta na ka bynta kito kiba lah ban ïakhun ïa ki eksam kam,” u la ong.
Katkum ka jingong jong u, ka sorkar ka thmu ban ai ka lad na ka bynta ki nongtrei adhoc ban ïakhun na ka bynta ki kam, ban pynthikna ba kim dei ban shah pynduh ki lad tang na ka daw ba ki la palat ka rta ne kiwei pat ki daw.
