Shillong, Nailar, 27: General Administration Department ka la pynmih ïa ka jingpyntip kaba ai jingmut ïa baroh ki tnad ba dei peit bad ki paidbah ba kin pyndonkam ïa ka Unique Identification Authority of India’s (UIDAI) Aadhaar QR Scanner App na ka bynta ban pynshisha ïa ki Aadhaar Card na ka bynta ka jingpynshisha (offline verification) ïa ki Aadhar Card.
Kane ka sienjam ka long ban khanglad ïa ka jingpyndonkam bakla ïa ki Aadhaar Card kiba thok ne kiba la shna thok.
Ka UIDAI ka la pynrung ïa u Secure QR Code ha manla ki shithi Aadhaar, PVC card, bad ka e-Aadhaar ba la download, kaba don ïa ki jingtip ba kongsan jong ka jingbun briew bad ka dur jong u nongbat Aadhaar.
Une u Code u dei uba la soi da ka digital, u bym lah ban pynjot, bad lah ban pule tang da kaba pyndonkam da ki Scanner ba la mynjur da ka UIDAI lane da ka Official Aadhaar QR Code Scanner App.
Ka jingdonkam jong ka Secure QR Code ka ai katto katne ki jingmyntoi, kynthup: ka jingpynshisha Offline, kaba pynlong ïa ka kaba biang bha ban pyndonkam ha ki jaka ba jngai kiba duna ki kor ki bor, ka jinglap mardor ïa ki jingbym ïahap ne ki kot ki sla Aadhaar thok bad ka jingpynbha ïa ka jingïada bad jingshaniah.
Ka tnad ka la kyntu ïa baroh ki ophis, ki agency, bad ki nongshong shnong ba kin shim ïa ka rukom pynshisha ïa u Aadhaar QR Code bad ban long kiba husiar na ka jingpyndonkam ïa ki kot ki sla kiba thok.
Ki kynhun bapher bapher kiba la ai jingmut ban pyndonkam ïa ka App ki long ki tnad Sorkar bad ki nongtrei kiba don shabar na ophis, ki Bank, ki NBFC, ki kompeni Insurance bad ki nongpynbiang ïa ki jingshakri Telecom, ki nongtrei bad ki nongaikam, ki Hotel bad ki Guest-House, ki notary, ki nongïasaid aiñ, bad ki nongpynshisha ïa ki kot ki sla bad ki paidbah nongshong shnong na ka bynta ban pynshisha hi dalade ïa ka jingpynshisha Aadhaar.
Lada don kano kano ka jingsuba ba la pyndonkam bakla ïa u Aadhaar, la bthah ïa ki riewshimet ban pyntip ïa ki jingjia sha ka UIDAI lyngba ka [email protected] lane telephone ha u number 1947 bad pyntip sha ka Ophis jong u Deputy Commissioner lada suba ba ka don ka jingshah leh thok.
